Prezıdent birqatar naqty tapsyrma berdi.
Qasym-Jomart Toqaevqa Ulttyq qaýipsizdik komıtetiniń qyzmetin reformalaý, ulttyq qaýipsizdik organdary jumysynyń negizgi jetistikteri men aldaǵy mindetteri týraly baıandaldy, dep habarlaıdy Almaty-akshamy.kz Aqordanyń baspasóz qyzmetine silteme jasap.
Ermek Saǵymbaev qazirgi ýaqytta UQK-niń quzyreti aıasynda bılikti kúshpen basyp alý, terrorlyq aktiler, jappaı tártipsizdik pen basqa da qylmystarǵa qatysty 27 qylmystyq is boıynsha tergeý jumystary júrgizilip jatqanyn málimdedi. Osy qylmystyq ister boıynsha 24 adam qamaýda otyr. Onyń 14-i – destrýktıvti dinı aǵym ókilderi.
Halyqaralyq esirtki bıznesine qarsy kúres aıasynda Almaty qalasynda TMD elderine esirtki tasymaldaıtyn óz «maınıng-fermasy» bar iri esirtki laboratorıasy joıyldy. Quny 3,7 mıllıard teńge bolatyn 188 keli mefedron jáne 57 mıllıon teńge tárkilendi.
UQK shekara qyzmeti memlekettik shekarany kúzetý jumystaryn kúsheıtip jatyr. Qańtar-aqpan aılarynda 2133 quqyqbuzýshy men 22 sý kóligi ustalǵan.
Kezdesý qorytyndysy boıynsha Memleket basshysy UQK organdarynyń jumysyn jetildirý jóninde birqatar naqty tapsyrma berdi.