Almatylyq Marhaba Tursynbekova «Almaty Business – 2025» memlekettik baǵdarlamasy boıynsha 6%-ben jeńildetilgen nesıe alyp, shaǵyn market ashty.
Saýda núktesiniń bir ereksheligi – bir buryshynda kofehana bar.
«Men mınımarketimdi ózgeshe etip ashýdy sheshtim. Qazirgi stıldegi dızaın elementterin paıdalana otyryp, saýdaǵa zamanaýı kózqaraspen keldim. Men osy turǵyn úı kesheniniń turǵyndary men mańaıymyzda salynyp jatqan túrli qurylystardyń jumysshylary úshin kireberisten kofe aımaǵyn jasadym. Jumys istep jatqanymyzǵa bir aı ǵana boldy, biraq kóptegen adamǵa ystyq kofe usyný arqyly olarǵa jaılylyq, kóterińki kóńil-kúı syılap júrgenimiz anyq. Tańymyz jaqsy bastalsa, kúni boıǵy tirligimizde de bereke bolary sózsiz», – deıdi «Ohana» shaǵyn marketiniń ıesi Markava Tursynbekova.
Sondaı-aq, ol osy oraıda «Qoldaý» ortalyǵynyń úlken qoldaýyn sezingenin atap ótti. Memlekettik baǵdarlamanyń kómegimen 25 mln. teńge nesıe alǵan Marhaba Tursynbekova búginde 7 adamdy turaqty jumyspen qamtyp otyr. Aldaǵy ýaqytta «Bıznestiń jol kartasy – 2025» baǵdarlamasy aıasynda 2-5 mln. teńgege deıingi qaıtarymsyz grant baıqaýyna qatysyp, jartylaı fabrıkat ónimderin óndirýdi kózdep otyr.
Taqyrypqa oraı aıta ketsek, «Almaty Business – 2025» baǵdarlamasynyń sharttary boıynsha Almaty qalasynyń kásipkerlerine 500 myń teńgeden 58 340 000 teńgege deıin, syıaqy mólsherlemesi 2% (kópbalaly az qamtylǵan otbasylar, I jáne II toptaǵy múgedekter, múgedek balalar tárbıelep otyrǵan otbasylar jáne ónerkásiptik parkterdiń rezıdentteri úshin) jáne 6% (qaryz alýshylardyń barlyq basqa sanattary úshin) bolatyn 3 jylǵa (aınalym qarajatyn tolyqtyrýǵa) jáne 7 jylǵa deıin (negizgi qarajatqa) kredıt beriledi.
Mine, memleketke masyl bolmaı, óz betimshe áreket etip, kún kóremin degen kez-kelgen isker janǵa memleket qoldaýy osyndaı.