Memleket basshysy Qasym-Jomart Toqaev VIII saılanǵan Qazaqstan Respýblıkasy Parlamentiniń birinshi sesıasynda Úkimetke shekaralas aýdandarda qonystanǵysy keletin azamattarǵa turǵyn úıdi arzandatý týraly tapsyrma berdi, dep habarlaıdy Almaty-akshamy.kz.
«Saladaǵy saıasatty júıeleıtin jáne túbegeıli jaqsartatyn qala qurylysy kodeksiniń mańyzy zor. Úkimet shekaralas aýdandarda qonystanǵysy keletin azamattarymyz úshin turǵyn úıdi arzandatý máselesin sheshýdiń jańa tásilderin ázirleýge tıis.
Sondaı-aq, ınjenerlik, áleýmettik ınfraqurylymdy jańǵyrtýǵa jáne qurýǵa nazar aýdarý qajet. Meniń oıymsha, bul mańyzdy strategıalyq mindet. Bizde 65 shekara mańy bar, ókinishke oraı, olardyń kópshiliginiń áleýmettik-ekonomıkalyq jaǵdaıy tómen deńgeıde», - dedi Qasym-Jomart Toqaev.
Prezıdenttiń aıtýynsha, keıde bul jaıt ekonomıkalyq faktorlarǵa tıimsiz ákimshilik-aýmaqtyq bólinisterden týyndap jatyr.
«Bul aýdandardyń strategıalyq mańyzdylyǵyn eskere otyryp, meniń tapsyrmam boıynsha ázirlenip jatqan aýyldyq aýmaqtardy damytý tujyrymdamasy sheńberinde Shekara mańyndaǵy aýmaqtardy damytý jónindegi naqty sharalardy kózdeý qajet.
Basty maqsat-halyqtyń ketýin azaıtý, adamdardyń ómir súrýine qolaıly jaǵdaı jasaý, shekara mańyndaǵy aýdandardyń ekonomıkalyq damýyna jańa serpin berý», - dedi Prezıdent
Aıta keteıik, elordada VIII saılanǵan Qazaqstan Respýblıkasy Parlamentiniń birinshici sesıasy ótip jatyr. Jıynǵa Memleket basshysy Qasym-Jomart Toqaev qatysýda.