Qasym-Jomart Toqaev Shyǵys Qazaqstan oblysyna jumys sapary barysynda Óskemen qalasyndaǵy kópbeıindi Onkologıa jáne hırýrgıa ortalyǵynyń bazasynda ashylǵan Sáýlelik terapıa jáne dıagnostıka ortalyǵyna bardy, dep habarlaıdy almaty-akshamy.kz.
Prezıdentke joǵary dáldikpen dıagnostıka jasaýǵa jáne onkologıalyq aýrýlardy emdeýge múmkindik beretin sońǵy býyndaǵy magnıtti-rezonansty tomografıa (MRT), Elekta Versa HD jelilik údetkishi, Discovery RT kompúterlik tomografy sıaqty zamanaýı medısınalyq qurylǵylardyń jumysy tanystyryldy. Sondaı-aq Ortalyq radıologıalyq sýretterdi saqtaýǵa jáne olardy tez taýyp, naqty ýaqyt rejıminde zertteýge arnalǵan PACS arhıvteý júıesimen jabdyqtalǵan.
Kópbeıindi onkologıa jáne hırýrgıa ortalyǵynyń dırektory Gúlmıra Saǵıdýllınanyń aıtýynsha, jyl saıyn munda 3 myńnan astam hırýgıalyq operasıa jasalady, onyń 60 paıyzynda az ınvazıvti emdeý tásilderi qoldanylady. Ortalyqta medısına mamandarynyń shetelderde biliktiligin arttyrý jáne qaıta daıarlaý isine aıryqsha mán beriledi. Otandyq jáne sheteldik mamandar shaqyrylyp, turaqty túrde sheberlik saǵattary uıymdastyrylyp turady.
Qasym-Jomart Toqaevqa Shyǵys Qazaqstan oblysyndaǵy onkologıalyq qyzmettiń qazirgi jaı-kúıi jóninde baıandaldy. Óńirde qaterli isikterdi erte anyqtaý kórsetkishteri aıtarlyqtaı artyp, aýrý deńgeıi úshinshi, tórtinshi satyǵa deıin asqynyp ketken syrqattardyń sany qysqarǵan. Sáıkesinshe, onkologıalyq aýrýdan qaıtys bolatyn azamattardyń sany azaıyp kele jatqany baıqalady.
Memleket basshysy ortalyq dárigerlerimen áńgimelesip, medısınalyq uıymnyń jumysyna tabys tiledi. Sondaı-aq elimizde osyndaı zamanaýı medısınalyq ortalyqtar ashý mańyzdy ekenin atap ótti.
– Óte jaqsy medısınalyq mekeme eken. Zamanaýı ári sapaly quraldarmen jabdyqtalǵan. Naýqastardy emdeý kerek. Qazir mundaı aýrýhanalar jalpyulttyq mańyzǵa ıe boldy. Ókinishke qaraı, onkologıa derti júrek-qan tamyrlary aýrýlarynan keıin ekinshi orynda tur, – dedi Qasym-Jomart Toqaev.
