Almaty qalasy máslıhatynyń depýtaty Erbolat Qasymov №132 mektep-gımnazıasy janyndaǵy japsarjaı qurylysynyń barysyn tekserdi, dep habarlaıdy almaty-akshamy.kz
Qazirgi ýaqytta mektep-gımnazıada 2000-ǵa jýyq oqýshy bilim alýda. Osyǵan baılanysty oqýshylardyń tyǵyzdyǵyn azaıtýǵa kómektesetin japsarjaı salynýda.
Nysan qurylysynyń jobasyna qosymsha oqý mekemesi ǵımaratynyń seısmoturaqtylyǵyn kúsheıtý qosylǵan bolatyn.
Depýtat Almaty qalasy ákimdiginiń, sondaı-aq Áýezov aýdany ákimdiginiń jaýapty basqarmalary men bólimderi ókilderiniń qatysýymen qurylys barysyn tekserip, turǵyndarmen jáne oqýshylardyń ata-analarymen kezdesti.
Mekteptiń qosymsha qurylysy tek oqý synyptaryn ǵana emes, sonymen qatar zamanaýı sport zalyn, asqanany da qamtıtyn bolady jáne 4 blokqa bólinedi. Ǵımarattyń syıymdylyǵy 880 oqýshyǵa arnalǵan, bul jańa mekteptiń syıymdylyǵyna teń. Qala boıynsha jaqyn arada taǵy 6 ǵımarat ashylady. Qalǵan 8 nysan aǵymdaǵy jyldyń qarasha aıynyń sońyna deıin paıdalanýǵa beriledi.
Esterińizge salsaq, Almaty qalasynyń damý josparlarymen tanysý barysynda Memleket basshysy Q.K. Toqaev qalanyń azamattar úshin qolaıly megapolıs retinde odan ári damýyna nazar aýdardy, bul shaharymyzdyń bilim berý salasynyń ınfraqurylymyn damytýdy da qamtıdy.
Buǵan deıin qala ákimi Alataý, Naýryzbaı jáne Túrksib aýdandarynda 12 600 oryndyq 8 memlekettik mektep salynyp jatqanyn, onyń ishinde úsh mektep jyl sońynda ashylatynyn atap ótken bolatyn.