Qazaqstan mektepterinde pedagog-assıstent qyzmeti engizildi
Mundaı mamandar erekshe bilim berý qajettilikteri bar oqýshylardy oqytýda, ıaǵnı ınklúzıvti bilim berýde suranysqa ıe, dep habarlaıdy Almaty-akshamy.kz QazAqparat saıtyna silteme jasap. Olar balalardyń mektepke tez úırenip ketýine kómektesedi. Bul týraly QazAqparat QR Bilim jáne ǵylym mnıstrliginiń baspasóz qyzmeti habarlaǵan.
Bilim jáne ǵylym mınıstri Asqat Aımaǵambetovtiń tapsyrmasy boıynsha elimizdiń barlyq óńirinde 700-ge jýyq pedagog-assıstent jumysqa kiristi. Aıta keteıik, QR BǴM-men erekshe bilim berý qajettilikteri bar balalardy oqytý úshin qolaıly jaǵdaı jasaý barysynda jumys atqarylyp jatyr.
«Bul muǵalimdi almastyrý degen sóz emes. Pedagog-assıstentterdiń aldynda pedagogıka men psıhologıa toǵysynda erekshe maqsat-mindetter qoıylǵan. Atap aıtsaq, balalardy baǵyttaý, olardyń oqý prosesine beıimdelýlerine kómektesý. Áńgime erekshe qajettilikteri bar balalar týraly bolǵandyqtan, pedagog-assıstent tehnıkalyq qoldaý da kórsete alady. Máselen, eger bala óz betinshe qozǵala almasa. Nemese eger balaǵa defektologtyń kómegi qajet bolsa, pedagogıkalyq qoldaý qajet. Biz bul jumysta belsendilik tanytyp júrgen úkimettik emes uıymdarǵa rızashylyǵymyzdy bildiremiz», - dedi QR BǴM Mektepke deıingi jáne orta bilim komıtetiniń tóraıymy Gúlmıra Kárimova.
Budan basqa, pedagog-assıstent erekshe bilim berý qajettiligi bar balalarǵa arnalǵan jeke bilim berý baǵdarlamalaryn ázirleýge qatysady. Qajet bolǵan jaǵdaıda oqý baǵdarlamalary bilim alýshylardyń qajettilikterine beıimdeledi. Olar ótken materıaldy ıgerýge ǵana emes, sonymen qatar erekshe qajettilikteri bar balanyń daǵdylaryn damytý dınamıkasyn baqylaýǵa kómektesedi. Sonymen qatar erekshe bilim berý qajettilikteri bar balalardyń qaýipsizdigi men densaýlyǵyn saqtaý úshin qajetti jaǵdaılardyń saqtalýyn qadaǵalaıdy.
«Mınıstrlik pedagog-assıstentterdi basqa da bilim berý uıymdaryna qosý, sondaı-aq olardyń jumys júktemesin anyqtaý boıynsha jumys júrgizip jatyr», - delingen QR BǴM baspasóz qyzmetiniń habarlamasynda.