Reseıde koronavırýs kúsheıip tur
Máskeýde 11 kúndik lokdaýn jarıalandy. Osy merzim ishinde dárihanalar men halyqqa qajetti zat satatyn dúkender ǵana ashyq bolady, dep habarlaıdy Almaty-akshamy.kz
Reseıde koronavırýs órshı tústi. Elde jappaı vaksınalaý jumystary júrgizilip jatqanymen, nátıje az. Kerisinshe, jaǵdaı odan ári ýshyǵyp barady. Kún saıyn kovıd juqtyrǵandar men qaıtys bolǵandar sany artyp jatyr. Osyǵan baılanysty búkil el boıynsha demalys kúnderi engiziletin boldy.
«Qazir indettiń jańa tolqynyna tegeýrindi toıtarys berý óte mańyzdy. Osy rette 30 qazan men 7 qarasha aralyǵynda búkil el boıynsha demalys jarıalaý týraly usynystaryńyzdy qoldaımyn», - dedi Reseı Prezıdenti Vladımır Pýtın.
El Prezıdenti Vladımır Pýtın óńir basshylaryna qajet bolsa qosymsha shara qabyldaýǵa bolatynyn da qadap aıtty. Muny eskergen Máskeý meri shuǵyl sheshim qabyldap, qazannyń 28-inen bastap qalada lokdaýn ornaıtynyn jarıalady. Oǵan sáıkes, kásiporyndar jumysyn toqtatady. Buqaralyq shara ótkizýge tyıym salynady. Al mektep oqýshylary demalysqa ketedi. 11 kún boıy qalada azyq-túlik dúkenderi men dárihanalar ǵana qyzmet kórsetedi. Eldegi epıdahýaldyń tym nasharlap ketýi vaksınalaý qarqynynyń tómendigimen baılanysty. Bılik ókilderi turǵyndardy tezirek ekpe alýǵa shaqyryp jatyr.
«Taǵy da qaıtalap aıtamyn. Vaksına ınfeksıaǵa shaldyǵýdy ári ólim qaýpin azaıtady. Osy rette vaksınalaý qarqynyn arttyrý kerek ekenine óńir basshylarynyń nazaryn aýdarǵym keledi. Al azamattarymyzdy ekpe saldyrýǵa shaqyramyn», - deıdi Reseı Prezıdenti Vladımır Pýtın.
Qazir dárigerler men sarapshylar indettiń tórtinshi tolqyny aldyńǵylaryna qaraǵanda áldeqaıda qaýipti bolýy múmkin ekenin eskertedi.
«Qazirgi tańda naýqastardyń densaýlyǵy tym tez nasharlap ketip jatyr. Buryn mundaı jaǵdaı tek egde adamdar arasynda baıqalsa, búginde aýyr halde jatqandar qatarynda 30 jastaǵy azamattar kóp. Osyǵan qarap, qazirgi koronavırýstiń áldeqaıda qaýipti ekenin aıtýǵa bolady», - deıdi bas dáriger Egor Lýkánov.
Kórshi elde ınfeksıaǵa shaldyǵý kórsetkishi 24 qyrkúıekten bastap ósip keledi. Kún saıyn 30 myńnan astam adamnan vırýs anyqtalady. Búginde olardyń jalpy sany 8 mıllıonnan asady.