İs-sharada depýtattar Májilistegi ózgerister, zańnama jáne Prezıdenttiń reformalary qalaı qoldanysqa engiziletini týraly aıtyp berdi.
Áleýmettik qyzmetter úıinde QR Parlamenti Májilisiniń depýtattary Erlan Stambekov, Aıdos Sarym jáne Sergeı Ponomarev Almaty qalasynyń Qoǵamdyq keńesiniń ókilderimen kezdesý ótkizdi, dep habarlaıdy Almaty-akshamy.kz
Kezdesý barysynda Májilis depýtaty Sergeı Ponomarev Qoǵamdyq keńes jumysynyń mańyzdylyǵyn atap ótti. Onyń paıymdaýynsha, bul vedomstvo tek qalanyń ǵana emes, onda jumys isteıtin adamdardyń da damýyna serpin beretinin aıta kelip, búgingi tańda birqatar Qoǵamdyq keńes músheleriniń máslıhat pen Májilistiń depýtattary bolǵanyn tilge tıek etti. Sondaı-aq, ol Parlamentte zańdardyń qalaı qabyldanatyny týraly baıandady.
Halyq qalaýlysy Erlan Stambekovtyń aıtýynsha, jańa depýtattyq korpýs naqty nátıjege baǵyttalǵan. Kezdesýde qazaqstandyqtardyń nesıe týraly zańyna ózgertýler engizýdi usynǵany jóninde aıtyp ótti.
«Men osy zańnyń bastamashysy boldym. Qazir nesıe berý erejeleri kúsheıtilip jatqanyn kórip otyrmyn. Sondaı-aq, zańǵa qol qoıylǵannan keıin birden jedel jáne tıimdi ózgerister engizildi», – deıdi E.Stambekov.
Al Májilis depýtaty Aıdos Sarym depýtattardyń oblystyq, aýdandyq jáne qalalyq máslıhattardyń qyzmetin ońtaılandyrý mindetin qoıyp otyrǵanyna toqtaldy.
«Biz halyqtyń shalǵaı qalalarǵa barýdyń ornyna jergilikti jerlerde problemalardyń sheshimin tabýy úshin energıany durys baǵytqa baǵyttaǵymyz keledi. Bul baǵytta Almatyda eshqandaı problema joq. Óıtkeni, munda óte belsendi máslıhat pen qoǵamdyq keńes bar, biraq jalpy Qazaqstan boıynsha bul másele aqsap tur. Ony sheshý úshin biz qazir Senatta qaralyp jatqan qoǵamdyq baqylaý týraly zań ázirledik», - dedi A.Sarym.
Kezdesý sońynda osyndaı talqylaýlardy turaqty túrde ótkizý qajettigi aıtyldy.