2025 jyly Qazaqstanyń mádenıet salasyndaǵy jetistikteri aıtarlyqtaı kóp boldy.
Beıjiń qalasynda Qazaqstannyń mádenıet ortalyǵy ashyldy, - dep habarlaıdy Aqshamnews.kz.
Ortalyq óner, til jáne mádenı almasýǵa jáne elimizdiń murasyn tanystyrýǵa arnalǵan eń iri alańǵa aınaldy. Ortalyq 2000-nan astam adamdy qabyldap úlgerdi. Mádenıet alańy kórme, bilim berý jáne aǵartýshylyq baǵytta jumys isteıdi. Bul Memleket basshysynyń Qazaqstannyń mádenı dıplomatıasyn nyǵaıtý jónindegi tapsyrmalaryna tolyq saı keledi.
2025 jylǵy mádenı oqıǵalardyń ishinen Nurǵısa Tilendıevtiń 100 jyldyq mereıtoıyn erekshe atap ótken jón. Ataýly kún IýNESKO-nyń 2024–2025 jyldarǵa arnalǵan halyqaralyq deńgeıde atalyp ótetin mereıtoılar tizimine endi. Bul – kompozıtordyń álemdik mýzyka mádenıetine qosqan úlesin aıqyndaıtyn oqıǵa. IýNESKO kompozıtordyń qazaq dástúrin, fólklorlyq mura men zamanaýı mýzykany úılestire bilgen kásibı sheberligin joǵary baǵalady.
Sonymen qatar, Abaıdyń 180 jyldyǵyna oraı Rım qalasynda uly aqynnyń eskertkishi ornatyldy. Bul mańyzdy oqıǵa Italıa halqynyń nazaryn aýdaryp, Qazaqstan men Eýropa arasyndaǵy mádenı baılanysty nyǵaıtty. Qyrǵyzstannyń Osh qalasynda Abaı atyndaǵy kóshe, eskertkish jáne mýzeı ashyldy. Bul – elderimiz arasyndaǵy berik baılanys pen qazaq oıshylynyń ortaq mádenı tarıhtaǵy orynyn aıshyqtaıdy.
Sondaı-aq Armenıadaǵy Qazaqstan mádenıeti kúnderi aıasynda Erevan qalasynda Abaı Qunanbaıuly atyndaǵy saıabaqtyń saltanatty ashylýy ótti. Bul oqıǵa Prezıdentimizdiń Erevanǵa jasaǵan resmı sapary barysynda memleket basshylary deńgeıinde jasalǵan kelisimderdiń nátıjesinde júzege asty.
Tamyz aıynda Qazaqstan men Qyrǵyzstan prezıdentteri qatysqan Muhtar Áýezov pen Shyńǵys Aıtmatovqa arnalǵan eskertkishtiń ashylýy ótti. Eskertkish Qazaqstan men Qyrǵyzstan arasyndaǵy rýhanı jáne ádebı birliktiń sımvolyna aınaldy.
Bıyl Aqtaý qalasyna Túrki áleminiń mádenı astanasy degen mártebe berildi. Bul mártebeni Halyqaralyq TÚRKSOI uıymy berdi. Aqtaý jıyrmadan astam eldiń mádenıet maıtalmandaryn qabyldap, festıvál, kórmeler, konferensıalar men shyǵarmashylyq jobalar uıymdastyrdy.
Sondaı-aq bıyl Armenıa men Reseıde Qazaqstannyń mádenı kúnderi ótti. Al Qazaqstanda Vetnam halqynyń mádenı kúnderi uıymdastyryldy. Mundaı is-sharalar halyqaralyq mádenı komýnıkasıany nyǵaıtyp, eldiń shyǵarmashylyq jobalarǵa degen qyzyǵýshylyǵyn arttyrýǵa yqpal etedi.
2025 jyly qazaqstandyq teatrlar da aıtarlyqtaı jetistikterge jetti. «Astana Opera» teatrynyń sheteldegi gastrólderi anshlagpen ótip, teatr ártisteri álemniń jetekshi sahnalarynda joǵary baǵalandy. Atap aıtqanda, Nursultan Ánýarbek álemdik operadaǵy eń bedeldi jobalardyń biri – Úlken teatrdyń Jastar baǵdarlamasyna konkýrs arqyly qabyldandy.