Qazaqstanda shokolad pen táttilerdi tutyný kórsetkishi tómendep jatyr, - dep habarlaıdy Aqshamnews.kz.
2025 jyldyń úshinshi toqsanynda Qazaqstan turǵyndary shokolad tutynýdy kúrt azaıtty. Bir adamǵa shaqqanda bar bolǵany 195 gram shokolad tutynylǵan. Bul ekinshi toqsanmen salystyrǵanda 21%-ǵa, al ótken jylmen salystyrǵanda 24%-ǵa az, dep habarlaıdy DataHub.
Sarapshylardyń aıtýynsha, bul kórsetkish sońǵy úsh jyldaǵy eń tómengi deńgeıge jetken, alaıda absolútti rekord emes. Osyndaı kólem 2011 jyldan 2019 jyldyń ortasyna deıin qalypty jaǵdaı bolǵan. Al shokoladpen qaptalǵan kámpıtterge kelsek, mundaǵy jaǵdaı ózgeshe: olardyń tutynýy baqylaý júrgizile bastaǵan ýaqyttan bergi eń tómengi deńgeıge tústi. Úshinshi toqsanda qazaqstandyqtar bir adamǵa shaqqanda 586 gram ǵana tutynǵan, bul ótken toqsanmen jáne ótken jylmen salystyrǵanda 7%-ǵa az.
"Aıta ketý kerek, tátti ónimderdiń ózi aıtarlyqtaı qymbattap jatyr. Máselen, qarastyrylyp otyrǵan III toqsannyń sońynda, ıaǵnı qyrkúıek aıynda, shokoladtyń baǵasy jyldyq eseppen úshten birinen astamǵa ósti. Al shokoladpen qaptalǵan kámpıtter salystyrmaly túrde az – shamamen 15%-ǵa qymbattady", – dep atap ótti sarapshylar.
Olardyń aıtýynsha, shokolad baǵasynyń ósýi álemdik deńgeıde baıqalyp otyr. Buǵan kakao-burshaqtarynyń tapshylyǵy sebep. 2024 jyly negizgi óndirýshi elderdegi ónimniń azaıýyna baılanysty kakao baǵasy kúrt kóterilip, 2025 jyly da joǵary deńgeıde saqtalýda.
"Sońǵy aılarda baǵalar qaıtadan tómendeı bastaǵanymen, óndiristiń belgili bir geografıalyq aımaqtarda shoǵyrlanýyna baılanysty júıeli táýekelder áli de saqtalyp otyr", – dep esepteıdi sarapshylar.