Ol – ataqty «Qan men ter» trılogıasynyń avtory Ábdijámil Nurpeıisov.
Búgin qazaqtyń qabyrǵaly qalamgeri, jazýshy, aýdarmashy Ábdijámil Nurpeıisov 97 jasqa toldy, dep habarlaıdy Almaty-akshamy.kz
Ábdijámil Nurpeıisov – 1924 jyly 22 qazanda Qyzylorda oblysy Aral aýdany Úshkóń aýylynda dúnıege kelgen. Qazaqstannyń Halyq jazýshysy. HH ǵasyrdaǵy qazaq ádebıetine zor úles qosqan jazýshy, qoǵam qaıratkeri.
1941-1945 jyldardaǵy II Dúnıejúzilik soǵys ardageri, Ońtústik jáne Prıbaltıka maıdanynda, Lýgansk túbinde mınomót rotasynda saıası qyzmetker, keıin shtabıst retinde Baltyq mańynda Kýrlándıa plasdarmyndaǵy shaıqastarǵa qatysqan.
1946 jyly jeltoqsanda Ábdijámil ásker qatarynda júrip «Kýrlándıa» romanyn jazýǵa kirisken. Ony bitirip baspaǵa bergen soń, bir jyl Qazaq memlekettik ýnıversıtetinde oqydy.
1954 jyly Máskeýdegi M.Gorkıı atyndaǵy Ádebıet ınstıtýtyna túsip, ony 1956 jyly bitirdi. Tyrnaqaldy kitaby úshin Jambyl atyndaǵy respýblıkalyq syılyqtyń ıegeri atandy.
1962-1964 jyldary Qazaqstan Jazýshylar odaǵynyń organy – «Juldyz» jýrnalynyń bas redaktory da bolyp qyzmet isteıdi, Qazaq SSR-i Joǵarǵy Keńesiniń depýtaty da boldy.
Qalamger A.P.Chehovtiń, A.M.Gorkııdiń, Nazym Hıkmettiń, ıspan jazýshysy A.Kesoniń shyǵarmalaryn qazaq tiline aýdarǵan.
«Qan men ter» trılogıasy, «Sońǵy paryz» dılogıasy - Á.Nurpeıisovtiń ǵana emes, kúlli qazaq ádebıetiniń tabysy. Jazýshynyń eren eńbegi eldiń, memlekettiń joǵary baǵasyna ıe boldy. Jazýshy retinde «Eńbek Qyzyl Tý», «Qurmet belgisi», Qazaqstan memleketiniń «Otan» ordenimen marapattalǵan.
2019 jyly jazýshy Almaty qalasynyń Qurmetti azamaty atandy.