AQSH-ta koronavırýstyń paıda bolýyna qatysty jańa boljam aıtyldy.
Jańa koronavırýs 2012 jyly qytaılyq kenshiniń denesinde paıda bolýy múmkin, vırýstyń úlgileri Ýhandaǵy zerthanaǵa jiberilip, ol sol jaqtan tarap ketýi yqtımal, - dep habarlaıdy Almaty-akshamy.kz Tengrinews.kz-ke silteme jasap.
Amerıkalyq Bioscience Resource Project uıymynyń atqarýshy dırektory Djonatan Latemniń aıtýynsha, vırýs uzaq ýaqyt boıy bir adamnyń denesinde bolǵan kezde evolúsıalanyp, birneshe mýtasıaǵa ushyraýy múmkin.
«Bir kenshide vırýs júzdegen mýtasıaǵa ushyrap, ol Sars-Cov-2 paıda bolýyna ákelgen. Onjyldyqtar shamamen alty aıǵa syıyp ketken. Bizdiń teorıamyz boıynsha, osyǵan uqsas evolúsıa 2012 jyly jumbaq aýrýdan keıin kenshilerdiń ókpesinde de bolǵan. Sol kezde kenshilerden alynǵan medısınalyq synamadan vırýs tarap ketýi múmkin», - dedi Latem.
Telegraph málimetinshe, 2012 jyly Qytaıdyń Iýnnan provınsıasyndaǵy kendi jarǵanat qaldyqtarynan tazalaý kezinde alty kenshiden «pnevmonıaǵa uqsas aýrý» anyqtalǵan. Olardyń úsheýi qaıtys bolyp, qalǵandary alty aıǵa deıin aýrýhanada jatqan. Sodan bir jyl ótken soń, Ýhan qalasynyń ǵalymdary dál sol jerdegi jarǵanattardan RaTG13 koronavırýsyn tapqan, bul 96 paıyzǵa COVID-19 týdyratyn vırýsqa uqsas.
«Biz koronavırýstar kende ártúrli jáne kóp bolǵanyn, keıbir kenshi uzaq ýaqyt aýrýhanada jatqanyn bilemiz. Olardyń emi alty aıǵa sozyldy jáne ol adam aǵzasyna beıimdelgen jańa koronavırýstardyń evolúsıasyna ákeldi», - dedi Latem.
Kenshiler juqqan vırýstyń úlgileri Ýhandaǵy zertteýshilerge jiberilgen, keıin onda COVID-19 taraǵan bolatyn.