Osylaı dep dabyl qaqqan ata-analar redaksıamyzǵa habarlasty.
Almaty oblysy, Qarasaı aýdanyna qarasty Kókózek mektebiniń oqýshylary mektepke tasymaldaıtyn avtobýsqa jarymaı otyr, dep habarlaıdy Almaty-akshamy.kz tilshisi.
Eltaı aýyldyq okrýgine qarasty Aqseńgir, Kóktoǵan aýyldary men Ogonók, Soıýzpechat, Aqsuńqar saıajaı birlestiginde mektep joq bolǵandyqtan, osy atalǵan qonystyń oqýshylary Kókózektegi aıadaı mektepke qatynap oqıdy. Al osy balalardy tasymaldaıtyn avtobýstar óte eski, sondyqtan da jıi buzylyp, oqýshylar sabaqtan qalyp qoıady.
«Qazir kún sýyta qoıǵan joq, aldymyz qys, sonda ne bolmaq? Úsh balam da osy mektepte oqıtyndyqtan avtobýstyń jyry maǵan málim, ol avtobýstar aptasyna birneshe ret buzylady da jatady. Bul birneshe jyl boıy qaıtalanyp, áli kúnge sheshimin tappaı kele jatqan másele. Osy aýyldyń turǵyny retinde Eltaı aýyldyq okrýginiń ákiminen máselemizdi sheship berýin suraımyn. Qaladaǵydaı skýlbas bermese de, jolda qaldyrmaıtyn jańa avtobýs bersin», deıdi Aqseńgir aýylynyń turǵyny Aıjan.
«Bul jyl saıynǵy jyr. Aýylymyzda mektep joq, mektep salynady degeli on shaqty jyldyń júzi boldy, ázirshe balalarymyz avtobýstyń azabyn tartyp júr. Saǵat 8-de bolatyn sabaqqa balany tańǵy 7 bolmaı alyp ketedi, sabaǵy bitken soń da balamyz úlken synyptyń sabaǵy aıaqtalǵansha kútip dalada júrýge májbúr, sebebi avtobýs jetispeıdi, bala sany kóp. Barlyq máseleni sheshetin «estıtin úkimet» bar kezde bizdiń janaıqaıymyzǵa da qulaq asatyn quzyrly oryn tabylar degen úmittemiz», deıdi Ogonók saıajaı birlestiginiń turǵyny, kóp balaly ana Shyryn.
Ata-analardyń aıtýynsha, Kókózek mektebinde sabaq 3 aýysymmen, 6 kún oqytylady, oǵan únemi buzyla beretin avtobýstyń jyry qosylyp sharshatty dep otyr.
Biz quzyrly mekemeniń jaýabyn estý úshin, ákimdikke qońyraý shalyp edik, telefonǵa jaýap bergen hatshy qyz ákimniń keńsede joǵyn jáne jeke baılanys nómirin bere almaıtynyn aıtty. Biraq avtobýsqa jarymaǵan mekteptiń máselesin aldaǵy ýaqytta da qozǵaıtyn bolamyz.