Ábilhan Qasteev atyndaǵy QR Memlekettik óner mýzeıi men Qazaqstan Ulttyq bankiniń uıymdastyrýymen «Qazaqstandy monetalar arqyly tany» atty kórme ashyldy.
Kórme elimizdiń ulttyq valútasynyń engizilgenine 30 jyl tolýyna oraı uıymdastyrylǵan. Bul ekspozısıa Qazaqstannyń ulttyq valútasy aınalymǵa engizilgen sátten bastap shyǵarylǵan biregeı monetalardy usyndy. Eksponattar mádenı, saıası jáne tarıhı sátterdi qamtıdy. Bul jádigerler kórermenderge qazirgi qoǵamnyń ómirine áser etken biregeı tarıhı oqıǵalarmen tanysýǵa múmkindik beredi. Monetalar kórermenderge halqymyzdyń mádenıetin, ádet-ǵurpyn, salt-dástúrin pash ete otyryp, koleksıalyq monetalarǵa qazirgi zaman turǵysynan jańasha kózqaras tanytatyndaı.
Egemendi jas memleketterdiń qataryna qosylǵan elimiz ben halqymyz Uly dalanyń baı tarıhynyń urpaǵy ári murageri desek, qatelespeımiz. Bizdiń jylnamamyz erjúrek kóshpendiler, ejelgi saqtar dáýirinen, jartastarǵa alǵashqy petroglıfterdi qaldyrǵan qolónershilerden bastaý alady. Bul – álemdik tarıhtyń orasan zor bóligi.
– Sol zamannan bastap soǵylǵan kóne teńgeler búgingi kúnge deıin jetken. Olar kóne dáýirdiń syryn ashyp qana qoımaı, Ulttyq bank dızaınerlerin ótken dáýirlerdiń túsi men rýhyn, sondaı-aq zamanaýı ınovasıalyq tehnologıalardyń kúshi men mánerliligin boıyna sińiretin zamanaýı monetalardy jasaýǵa shabyttandyrdy. Olardy paıdalaný nátıjesi sýretshilerdiń túpki oıyn tolyǵymen júzege asyrýǵa jáne monetalardyń mánerliligi men sulýlyǵyna qol jetkizýge múmkindik berdi, – deıdi kórme jetekshisi Aqjigit Núsip.
Kórmede jańa KOKBÓRI ınvestısıalyq monetalary tanystyryldy. Qazirgi ýaqytta ınvestısıalyq monetalar naryǵyndaǵy jahandyq úrdister dızaıny aıryqsha koleksıalyq jáne syıǵa tartylatyn monetalarǵa baǵyttalǵan. Osyǵan oraı, Qazaqstannyń ınvestısıalyq monetalar naryǵyn ózektendirý, olardy tanymal etý jáne halyqaralyq naryqta ilgeriletý maqsatynda Qazaqstan Ulttyq banki ALTYN BARYS jáne KUMIS BARYS atty ınvestısıalyq monetalaryna rebrendıng jasady.
Jańa KOKBÓRI ınvestısıalyq monetalarynda «Kóshpendilerdiń qasıetti janýarlary – totemderi» atty monetalar serıasynyń dızaın stıli paıdalanylǵan, olardyń joǵary tanymaldylyǵy qysqa merzimde Qazaqstannyń «totemdik» ınvestısıalyq monetalarynyń ózindik biregeı brendin jasaıdy.
