Almatyda erekshe kitaphana ashyldy
Adamdar ár kúni kofe satyp alyp ishýi múmkin, biraq ár kúni kitap satyp ala bermeıdi. Al kofe men kitapty birlestirý qoǵamda kitapqumar adamdardyń qataryn molaıtýǵa kómektesedi. Mine osy ıdeıadan Almatyda erekshe kitaphana oqyrmandarǵa óz esigin ashty. «Kitap kofehanasynyń» ashylýy búgin, 23 sáýir Halyqaralyq kitap kúnine oraı ótkizildi dep habarlaıdy Almaty-aqshamy.kz.
Oqyrman mádenıetin qalyptastyrýǵa áser eterlik bastamany «Mazmundama» baspasy júzege asyrǵan. Kitaphana men kofehanany birlestirgen ortalyq Coffe Book dep atalady. Onda atalmysh baspadan jaryq kórgen barlyq kitaptardy tabýǵa bolady. Búgingi ashylý saltanatyna Almatydaǵy kitapsúıer jurtshylyqpen qatar zıaly qaýym ókilderi, qalamgerler jınaldy.
Joba jetekshisi Shyńǵys Muqan «Kitap kofehanasy» jaıynda: «Maqsatymyz kofe satý emes edi... Oqyrmandarymyz "Mazmundama" baspasynyń barlyq kitaptaryn taba alatyn kitap dúkenin ashqymyz kelgen. Eseptep qarasaq, taza kitap dúkeni ózin (qarjylyq turǵyda) aqtaı qoımaıtyn bolyp shyqty. Sodan, kofehana men kitap dúkeniniń basyn qosaıyq dep sheshtik. Nátıjesinde Coffe Book dúnıege keldi», – deıdi óziniń áleýmettik jelidegi paraqshasynda.
Almatylyqtarǵa ashylǵan «Kitap kofehanasy» kitap satyp alýshylarǵa tegin kofe usynbaq. Bul arqyly kitap alarmandaryn yntalandyrýdy kózdeıdi. Mundaı aksıany apta sońyna deıin jalǵastyryp, almatylyq kitapqumarlardyń nazaryn ózine aýdarmaq. Joba avtorlary eldegi kitap mádenıetin qalyptastyrý, oqyrman qataryn molaıtýdy kózdegen. Bul úshin «Mazmundama» ujymy 2050 jylǵa deıin 500-ge jýyq túrli formattaǵy kitap ortalyqtaryn ashýdy maqsat etip otyr.
Bir halyqtyń kitappen bolǵan qarym-qatynasy sol eldiń ǵylym-bilimge degen qarym-qatynasyn aıqyndaıdy. Alaıda, elimizde kitap oqyrmandarynyń azdyǵy kópten aıtylyp kele jatqan taqyryp. Bul taqyryp naýryzda ótken Ulttyq quryltaıdyń úshinshi otyrysynda da kóterilgen bolatyn. Memleket basshysy kitap pen bilimge áýes jańa býyndy tárbıelep jetildirý ult sapasyn joǵarylatýdyń basym bir baǵyty bolaryn jetkizgen edi.
Sońǵy jyldary oqyrman qalyptastyrý, aýdarma, baspa isi, kitap bıznesi elimizde birtindep damyp jatqany baıqalady. Buǵan jekelegen bastamashyl tulǵalar men ujymdardyń atqarǵan isteri de óz áserin berýde. Osy oraıda aıta keteıik, 2018 jyldan beri jumys istep kele jatqan "Mazmundama" baspasy eldegi kitap mádenıetin qalyptastyrýdaǵy biregeı jobalardyń biri. Qazirge deıin 400-den astam kitapty qazaqstandyq oqyrman qaýymyna usynǵan bolatyn.
