Kerbulaq turǵyndary ilbisti tabıǵı ortasyna qaıtarýǵa sebepshi boldy
Almaty oblysynyń Kerbulaq aýdanyndaǵy Kerbulaq kentiniń turǵyndary jalǵyz qalǵan taýtannyń (ilbistiń urǵashysy – red.) úırenshikti mekenine aman jetýine sebepshi boldy, dep habarlaıdy Almaty-akshamy.kz ekologıa, geologıa jáne tabıǵı resýrstar mınıstrliginiń baspasóz qyzmetine silteme jasap.
Oqıǵa 3 qańtar kúni bolǵan. Saǵat 12:00-ler shamasynda Kerbulaq kentiniń Ámirhan Aǵambaev, Saıat Áktaı jáne Bekdáýlet Jeńisuly deıtin turǵyndary eldi meken mańyndaǵy dalada jalǵyz qalǵan ilbisti (qar barys) baıqaıdy. Taýtannyń adam jaqyndasa da qashpaıtynyn, tipti boı tasalaýǵa da tyryspaǵanyn baıqap, turǵyndar tıisti mamandarǵa habar bergen.
«Altynemel» memlekettik ulttyq tabıǵı parki men «Ohotzooprom» RMQK ınspektorlary kelgenshe turǵyndar jyrtqyshty tasa qylmaı kútken.
«Tabıǵı park ınspektorlary Zoologıa ınstıtýtynyń ǵylymı qyzmetkerlerimen birlesip, jyrtqyshty «Altynemel» parkiniń aýmaǵyna jetkizdi. Saǵat 20.00 shamansynda taýtannyń moınyna spýtnıkke jalǵanǵan moıynbaý taǵylyp, úırenshikti mekenine qoıa berdi. Aıta ketý kerek, bul «Altynemel» aýmaǵynda turatyn ilbisterge taǵylǵan úshinshi moıynbaý. Fototuzaq kómegimen alynǵan málimetter boıynsha, saıabaqta 10-ǵa jýyq ilbis mekendeıdi. Ulttyq park osy sırek kezdesetin janýarlardy saqtaý úshin barlyq qajetti sharalardy qolǵa alady», - dep jazady mınıstrliktiń baspasóz qyzmeti.
İlbis (qar barysy) QR Úkimetiniń 2006 jylǵy 31 qazandaǵy N 1034 qaýlysy boıynsha, sırek kezdesetin jáne quryp ketý qaýpi tóngip turǵan janýarlardyń tizbesine engizilgen.