Júıe aıasynda azamattardyń ulttyq elektrondyq densaýlyq pasportyn jasaý, mıkroservıstik arhıtektýrany paıdalanýǵa kóshý jáne anyqtamalyq málimetter bazasyn qurý kózdelgen.
QR Premer-Mınıstriniń orynbasary Eraly Toǵjanov Májilis ókilderiniń depýtattyq saýalyna joldaǵan jaýabynda densaýlyq saqtaý júıesin sıfrlandyrý baǵytynda eHealth aqparat júıesin 2023 jyly iske qosý kózdelgenin aıtty
«Qazirgi tańda densaýlyq saqtaý júıesin sırflandyrýdyń negizgi mindeti – Densaýlyq saqtaý mınıstrligi men onyń baǵynysty uıymdarynyń bytyrańqy jatqan aqparattyq júıelerin biriktirý. Bul máseleni sheshý úshin eHealth atty densaýlyq saqtaýdyń jańa sıfrlyq elektrondyq sáýletine kóshý júzege asyrylyp jatyr. Sonyń aıasynda azamattardyń ulttyq elektrondyq densaýlyq pasportyn jasaý, mıkroservıstik arhıtektýrany paıdalanýǵa kóshý jáne anyqtamalyq málimetter bazasyn qurý kózdelgen», - dep jazady Eraly Toǵjanov.
Onyń sózine qaraǵanda, eHealth júıesiniń quramdas bólikterin iske qosý 2022 jylǵa josparlanǵan. Al júıeniń ózi 2023 jyly tolyq jumys isteı bastaıdy.
«Qazir densaýlyq saqtaý mınıstrliginiń aqparattyq júıelerin modıfıkasıalaý, eHealth ıadrosynyń bazalyq bólshekterin ázirleý jumystary júrip jatyr. Modıfıkasıa aıasynda «sıfrlyq erkindik» qaǵıdatyn qamtamasyz etý kózdelgen. Bul qaǵıdat boıynsha medısınalyq aqparat júıeleri arasnynda derekterdi joǵaltpastan almasý josparlanyp otyr. Bul medısınalyq uıymdardyń medısınalyq aqparat júıelerine táýeldigin joıady. Qazirgi tańda «Vaksınalaý», «Vaksınalaýdyń elektrondy pasporty», «Klınıkalyq aqparattyń ortalyq saqtaǵyshy» sıaqty modýlder jasaldy», - delingen vıse-premerdiń jaýabynda.
Sondaı-aq, Eraly Toǵjanov eldegi pedıatr mamandardyń tapshylyǵy qalaı sheshilip jatqanyn aıtyp berdi.