Bul týraly Ulttyq banktiń tóraǵasy Ǵalymjan Pirmatov málimdedi.
2022 jyldyń qorytyndysy boıynsha Qazaqstanda jyldyq ınflásıa 20,3%-ǵa jetti, dep habarlaıdy Almaty-akshamy.kz
Aıtýynsha, byltyr jeltoqsanda aılyq ınflásıa 1,2%-ke deıin baıaýlaǵanyna qaramastan, sońǵy bes jyldaǵy ortasha aılyq kórsetkish 0,7%-ten aıtarlyqtaı asyp tústi.
«Jyldyq mánde ınflásıa 20,3%-ǵa jetti. Azyq-túlik baǵasynyń ósýi ınflásıaǵa zor úles qosyp, jyldyq kórsetkish boıynsha 25,3%-ǵa jetti. Jemis-jıdek pen kókónis ónimderi qys maýsymyna baılanysty qymbattady», - dedi Pirmatov Úkimet otyrysynda.
Al azyq-túlikke jatpaıtyn ınflásıa 19,4%-ǵa deıin ósken. Importtyń joǵary úlesi bar taýarlar, onyń ishinde jeke paıdalanatyn taýarlar, jýatyn jáne tazalaıtyn zattar, qurylys materıaldary, dári-dármek baǵasy edáýir ósken.
Ákimshilik retteý sebebinen janar-jaǵarmaı men 2021 jylǵy joǵary baza esebinen avtokólik baǵasynyń ósý qarqyny baıaýlady.
«Jeltoqsan aıynda aqyly qyzmetterdiń ınflásıasy 14,1% deńgeıinde saqtaldy. Turǵyn úıdi jalǵa alý men komýnaldyq qyzmetterdiń quny ósý turǵysynan baıaýlady», - dedi Ulttyq bank tóraǵasy.
2022 jylǵy 5 jeltoqsanda Ulttyq bank bazalyq mólsherlemeni 16,75%-ke deıin kótergen bolatyn. Pirmatov byltyr qabyldanǵan sharalar ınflásıany tómendetýge jáne ony orta merzimdi perspektıvada odan ári turaqtandyrýǵa yqpal etetinin aıtty.