Qabyldaý tórt kezeńnen turady.
Bıylǵy «Bolashaq» halyqaralyq stıpendıasyn taǵaıyndaý konkýrsyna qatysýǵa qujattar qabyldaý bastaldy, dep habarlaıdy Almaty-akshamy.kz Ǵylym jáne joǵary bilim mınıstrligi baspasóz qyzmetine silteme jasap.
Vedomstvonyń málimetinshe, tórt kezeńnen turatyn qujat qabyldaýdyń alǵashqy kezeńi 27 qańtarǵa deıin jalǵasady.
Ekinshi kezeń 2023 jylǵy 3 sáýir men 28 sáýir aralyǵynda, odan keıin 5 maýsym men 7 shilde aralyǵynda jáne 17 shilde men 15 qyrkúıek aralyǵynda júrgiziletin bolady.
Konkýrstyq irikteý 2023 jylǵy 20 qańtar men 31 jeltoqsan aralyǵynda ótedi. Ótinimder Egov.kz memlekettik qyzmetter portaly arqyly qabyldanady.
Bıyl magıstratýra jáne rezıdentýra baǵdarlamalaryna 395 stıpendıa, doktorantýraǵa 50 stıpendıa, taǵylymdamadan ótý úshin 110 stıpendıa bólindi. Usynylatyn JOO-lar tizimi álemniń 27 elinen 236 ýnıversıtetti qamtıdy. Basym mamandyqtar tizbesine 262 mamandyq kirdi.
Prezıdent Qasym-Jomart Toqaevtyń «Bolashaq» baǵdarlamasyn qaıta baǵdarlaý jónindegi tapsyrmasy boıynsha «Injenerlik-tehnıkalyq mamandar» jeńildik sanaty bekitildi.
Sonymen qatar, medısınalyq qyzmetkerler úshin jeńildik sanaty engizildi. Kvotalyq sanattardyń tegin tildik daıyndyqtan ótý múmkindigi bar. Sondaı-aq olar qujat tapsyrǵan kezde sheteldik JOO-ǵa óz betimen túsýge mindetti emes. Olar oqý ornyn stıpendıa taǵaıyndalǵannan keıin baǵdarlama aıasynda oqýǵa usynylatyn JOO-lar tiziminen tańdaı alady.
Jetekshi sheteldik joǵary oqý ornynan shartsyz shaqyrýy bar úmitkerler ǵana «Bolashaq» stıpendıasyn taǵaıyndaý konkýrsyna qatysa alady. Olarǵa jeńildigi bar kandıdattar jatpaıdy.