Bul týraly Parlament palatalarynyń birlesken otyrysynda Qazaqstan halqyna Joldaýyn jarıalaǵan Memleket basshysy Qasym-Jomart Toqaev aıtty.
«Azamattardyń múddesi men suranysy – Qazaqstannyń ekonomıkalyq damý strategıasynyń ózegi. Iaǵnı, adamnyń qajettiligi árdaıym basty nazarda bolady. Sol úshin biz shıkizatqa táýeldi bolýdan birtindep arylýymyz qajet. Bul jumys tabandy túrde júrgizilýge tıis. Elimizde jyl saıyn 400 myńnan astam bala dúnıege keledi. Jyl sońyna deıin halqymyzdyń sany 20 mıllıonǵa jetedi», - dedi Qasym-Jomart Toqaev.
Prezıdenttiń atap ótýinshe, ómir súrý uzaqtyǵy da artyp kele jatyr. Byltyr bul kórsetkish 74 jastan asty. Qazaqstan – álemdegi eń jas memlekettiń biri. Azamattarymyzdyń ortasha jasy – 32 jas. Turǵyndardyń úshten biri – jastar.
«Úkimettiń mindeti – qazirgi demografıalyq ahýaldy elimizdiń básekege qabiletin arttyrýǵa paıdalaný. Adal azamat jáne tuǵyrly tulǵa bolýdyń negizi bala kezden qalyptasady. Sondyqtan biz jas urpaqtyń qaýipsiz ári alańsyz ómir súrýin qamtamasyz etýge tıispiz», - dedi Memleket basshysy.