Bul týraly ortalyq komýnıkasıalar qyzmetinde ótken brıfıńte «Eńbek resýrstaryn damytý ortalyǵy» AQ prezıdenti Dáýlet Arǵyndyqov aıtty, dep habarlaıdy almaty-akshamy.kz
Óz sóziniń basynda spıker COVID-19 pandemıasynan týyndaǵan daǵdarys jaǵdaıynda memlekettik jumyspen qamtý qyzmetteriniń jumysy halyqqa jumys izdeýge baılanysty máselelerdi sheshýge kómektesý úshin mańyzdy ekenin atap ótti.
«Aýdandar men qalalardaǵy 203 jumyspen qamtý ortalyǵy jumys izdeýshiler úshin jumyssyz retinde tirkelýge, jumys izdeýge jáne jumysynan aıyrylý boıynsha áleýmettik tólem men ataýly áleýmettik kómek alýǵa qoldaý kórsetedi. Túrli sebeptermen tez jumys taba almaıtyn azamattarǵa «Eńbek» memlekettik baǵdarlamasy boıynsha búdjetten sýbsıdıalanatyn ýaqytsha jumystar usynady. 2021 jyldyń basynan beri jumys tájirıbesi joq 16 myń jas azamat oqý oryndaryn bitirgennen keıin jastar praktıkasyna jiberildi. Biliktiligi tómen 110 myńnan astam adam qoǵamdyq jumystarǵa tartylǵan. 16 myń adam áleýmettik jumys oryndaryna ornalastyryldy. 14 myń jumyssyz azamat qysqa merzimdi oqýǵa jiberildi. 2021 jyly jumyspen qamtý ortalyqtaryna barlyǵy 432 myń adam júgingen», – dedi Dáýlet Arǵyndyqov.