Qazaqstannyń eńbek sińirgen qaıratkeri Júrsin Erman Memleket basshysynyń halyqqa Joldaýynda kezekten tys Prezıdent saılaýyn ótkizý týraly málimdemesine qatysty pikirin bildirdi, dep habarlaıdy almaty-akshamy.kz Almaty.tv. silteme jasap
«El Prezıdenti Qasym-Jomart Toqaev halyqqa arnaǵan Joldaýynda kezekten tys prezıdent saılaýyn ótkizý týraly usynysyn bildirdi. Osy másele tóńireginde áńgime júrip jatyr. Birinshiden, bul usynys qabyldansa, endigide QR Prezıdenti bir rettik 7 jyldyq merzimge saılana alady. Qaıtadan saılaýǵa túse almaıdy. Bul konstıtýsıalyq norma bolady. Munyń ne artyqshylyǵy bar? Birinshiden, 7 jyl - tarıh úshin úlken ýaqyt. 7 jylǵa prezıdent saılaý - postkeńestik elderdiń tájirıbesinde bolmaǵanymen, álemdik tájirıbede bar nárse. Izraılde, Armenıada sondaı. Fransıada da saılaýdyń osy túrin qarastyryp jatyr. 7 jyldyq merzimge prezıdent saılaý joǵary bılikti monopolızasıalaýǵa múmkindik bermeıdi. Qaıtadan saılanbaıtynyn bilgen prezıdent 7 jyl ishinde alańsyz eldiń ishki-syrtqy máselelerin sheshýmen aınalysady. Kelesi jyly saılaýdan ótem be, ótpeımin be dep bas qatyrmaıdy», - deıdi Júrsin Erman.
Onyń sózinshe, Prezıdenttiń bastamasymen elimizde úlken saıası ózgerister bolyp jatyr.
«Elimizde biraz saıası ózgerister bolyp jatyr. Qasym-Jomart Toqaev birtalaı ózgeristerdi bastap ta ketti. Prezıdentimizdiń ózi bastaǵan úlken reformalardy ózi aıaqtaýyna múmkindik berýimiz kerek. Oǵan ýaqyt kerek», - dep pikirin bólisti aqyn.
Júrsin Ermannyń aıtýynsha, Toqaevtyń bılik basynda otyrýyna laıyq ekenin halyq ta bilip otyr. Sondaı-aq Prezıdentimiz osy kezde Qazaqstannyń abyroıyn bıikke kóterip, basqalardyń doq kórsetýine múmkindik bermeı, óziniń berik pozısıasyn ustanyp, bir eldiń tizginin ustap otyr deıdi aqyn.
«Áleýmettik jeliden estip-bilip otyrmyz, opozısıalyq kúshter Toqaevqa qarsy kandıdat usynbaqshy. Biraq qazirgi kezde Toqaevpen teń túse alatyn adamnyń joqtyǵyn halyq ta kórip otyr. Toqaev Premer-Mınıstr de boldy, Senatty da basqardy, BUU-da da bas hatshynyń orynbasary bolyp qyzmet etti. Ol – halyqaralyq deńgeıde bedelge ıe bolǵan asa tájirıbeli dıplomat, qansha jyl bılikte júrse de, sońynan sóz ermegen adam. Qazirgi kezde alpaýyt memleketter bir-birimen tiresip jatyr, soǵys ta bolyp jatyr. Prezıdentimiz osy kezde Qazaqstannyń abyroıyn bıikke kóterip, basqalardyń doq kórsetýine múmkindik bermeı, óziniń berik pozısıasyn ustanyp, bir eldiń tizginin ustap otyr. Sondyqtan da onymen terezesi teń keletin basqa iri tulǵa qazir kórinip turǵan joq», - dedi aqyn.
Aqyn halyqtyń 7 jyldyq merzimge saılaýǵa kelisim berip, saılaýda Toqaevty qoldaıtynyna kámil senedi.