Prezıdenttiń bastamasymen qolǵa alynǵan Jumysshy mamandyqtar jyly eńbek naryǵynda Almatydaǵy kolejdiń túlekterine suranys artypty.
Buǵan mysal, Týrızm jáne qonaqjaılylyq ındýstrıasy koleji (TJQıK). Ol bıznespen yntymaqtasyp, tájirıbemen ushtasqan oqý ádisin sátimen júzege asyryp keledi. Óńirlik komýnıkasıalar qyzmeti uıymdastyrǵan baspasóz týry barysynda kolej dırektory osylaı dep málimdedi.
Jumysshy mamandyqtar jylynda tehnıkalyq jáne kásiptik bilim beretin uıymdarda básekege qabiletti kadrlar daıarlaý men olardy jumysqa ornalastyrýǵa erekshe kóńil bólingen. Týrızm jáne qonaqjaılylyq ındýstrıasy koleji osy baǵytta jumys berýshilermen áleýmettik seriktestikti tıimdi qoldana otyryp, oqý bitirgen túlekterin kásibı ortaǵa sátimen beıimdeı alatyn oqý orny retinde kózge túsken.
Kolej kóp jyl boıy qonaq úı men meıramhana bıznesine kadr daıarlap kele jatqan tehnıkalyq jáne kásiptik bilim beretin Qazaqstandaǵy jetekshi mekeme sanalady. Salalyq kásiporyndarmen tyǵyz baılanys ornata otyryp, kolej oqý sapasyn joǵary deńgeıde ustap turýmen qatar, stýdentterine qyzmette ósip-ónetin múmkindik usyna alady. Búginde kolej túlekteriniń jumysqa ornalasý kórsetkishi 83%-ǵa jetipti. Olar jumys berýshilermen qoıan-qoltyq jumys istegendikten osyndaı nátıjege qol jetkizgen.
«Biz jumys berýshimen kelisip, áleýmettik seriktestermen tyǵyz baılanys ornattyq. Sodan stýdentterimiz jumys taýyp ketip jatyr. Jumys berýshilerdiń qaýymdastyqtarymen jáne basqa da uıymdarmen birlese otyryp, stýdentterge praktıka men taǵylymdamadan ótý múmkindigin usynamyz. Bıyl kolejdi 460 stýdent bitirdi, sonyń 83%-y óz mamandyǵy boıynsha jumysqa ornalasty. Qalǵany oqýyn jalǵastyryp jatyr, áskerı qyzmette nemese dekrettik demalysta qazir. Bul birlesip istegen osyndaı úlken jumystyń arqasy», – dedi kolej dırektory Nurdáýlet Jabyqbaev.
TjQIK Almaty qalasyndaǵy 280 kásiporynmen – qonaq úıler, meıramhanalar, týrısik kompanıalarmen yntymaqtastyq týraly kelisimshartqa otyrǵan. Osynyń arqasynda stýdentter tájirıbeden ótip, dıplom alǵansha kásibı ortaǵa beıimdelip úlgeredi. Sonymen qatar, jumys berýshiler kolejge eńbek naryǵyndaǵy suranystar jóninde únemi aqparat berip otyrady, bul oqý baǵdarlamasyn der kezinde beıimdep, stýdentterdiń zaman talabyna saı mashyqtanyp shyǵýyna múmkindik beredi.
Kolejdiń bos jumys oryndarynyń jármeńkesi men jumys berýshilermen uıymdastyratyn kezdesýdiń de túlekterdi jumysqa ornalastyrýǵa kóp septigi tıgen. Bul stýdentterge oqý barysynda bolashaq jumys berýshimen jaqyn tanysýǵa jol ashady. Osy modeldiń arqasynda TjQIK túlekteri jumysqa ornalasyp qana qoımaı, óz mamandyǵy boıynsha jumys istep, jańa ujymǵa tez beıimdelip, kásibı turǵyda damý jolyn bastap ketip jatyr.
«Bizdiń túlekterimiz mamandyq boıynsha jumysqa ornalasyp, qoǵamdyq tamaqtaný oryndarynda aspaz, kondıter nemese tipti qonaqúı sharýashylyǵynyń basshysy deńgeıine deıin ósip keledi. Bizde Túlekterdiń ósýi men jumysqa ornalasýyn qamtamasyz etetin arnaýly ortalyq jumys isteıdi. Bul ortalyq túlekterdiń óndiriste jumysqa ornalasý kórsetkishin barynsha arttyrýǵa tyrysady. Munda túrli sheberlik sabaqtary, qonaq dáristeri ótkiziledi. Biz jumys berýshilerdi shaqyryp, túlekterge jumysqa ornalasý joldaryn túsindiremiz, jármeńkeler uıymdastyramyz», – deıdi kolejdiń oqý-óndiristik jumys jónindegi orynbasary Gúlim Ómirbekova.
Kolej qazir óz salasy boıynsha Qazaqstandaǵy eń úzdik kolejderdiń qatarynda ekenin senimdi túrde dáleldep otyr. Kolej basshylyǵy mundaı nátıjege áleýmettik seriktestik pen kásibı mamandar daıarlaýǵa baǵyttalǵan turaqty jumystyń arqasynda qol jetkizgenin aıtady.
«Men Tamaqtanýdy uıymdastyrý mamandyǵy boıynsha bilim aldym, “aspaz-tehnolog” biliktiligin ıelendim. Bıyl kolejdi támamdadym. Oqý baǵdarlamasy óte unady. Dýaldy oqytý boıynsha oqydym, bir apta praktıka, bir apta teorıa onda. Bul óte úlken artyqshylyq, sebebi praktıkalyq sabaqtar asa mańyzdy ról atqarady. Sen jumystyń barysynda úırenesiń. Óndiristiń ishki qurylymymen tanysyp, áriptestermen qarym-qatynas ornatyp, olardyń tájirıbesin meńgeresiń. Meni shef-aspaz Taras Korchagın qabyldap, kóp nárse úıretti. Ol da osy kolejdi bitirgen. Kolejden keıin osy jerge aspaz bolyp jumysqa turdym, qazir shef deńgeıine deıin kóterildim», – deıdi kolej túlegi Ibragım Ábdýrahımov.
Bilim berý men bıznestiń ózara tıimdi seriktestigi naqty ári turaqty nátıjelerge qol jetkizýge múmkindik beredi.
Kolej túlekteri – el ekonomıkasynyń mańyzdy bóligine aınalyp, óz mamandyǵy boıynsha jumys taýyp, sala-salanyń damýyna úles qosyp jatyr. Týrızm jáne qonaqjaılylyq ındýstrıasy koleji – bilim berý júıesiniń tıimdi jáne nátıjeli bola alatynyn dáleldegen oqý ornynyń biri bolyp otyr.