Almatyda azamattardan aqsha bopsalady degen kúdikke ilingen jalǵan polıseıler ustaldy.
Almaty qalalyq PD Esirtki qylmysyna qarsy kúres basqarmasy qyzmetkerleri JQAJ sarbazdarymen birlesip, ózderin polısıa qyzmetkeri retinde tanystyryp, osy syltaýmen azamattardan aqsha talap etken topty ustady, - dep habarlaıdy Aqshamnews.kz Polisia.kz-ke silteme jasap.
Arnaıy is-shara barysynda kúdiktilerden “Polısıaǵa járdemdesý otrády” qoǵamdyq birlestiginiń jalǵan qyzmettik kýálikteri, kisender jáne aqsha qarajattary tárkilendi. Ustalǵandar ózderin esirtki polısıasy qyzmetkerleri retinde tanystyryp, qylmystyq jaýapkershilikke tartamyz dep qorqytyp, aqsha aýdarymdary men qolma-qol qarajat talap etken. Úsh kúdikti de ýaqytsha ustaý ızolátoryna qamaldy. Sot olardy qamaýda ustaý túrindegi bultartpaý sharasyn sanksıalady. “Bopsalaý” baby boıynsha qylmystyq is qozǵaldy.
— Bul – bıylǵy jyly ózderin polısıa qyzmetkeri retinde tanystyryp, azamattardy aldaǵan úshinshi jaǵdaı. Mundaı derekter qoǵamnyń quqyq qorǵaý organdaryna degen senimine nuqsan keltiredi, sondyqtan biz mundaı áreketterge qatań tosqaýyl qoıamyz. Naǵyz polısıa qyzmetkerleri tek zań aıasynda áreket etedi. Almaty turǵyndaryna úndeý jasaımyn: eger ózderin polısıa qyzmetkeri retinde tanystyrǵan adamdardyń áreketterine kúmándansańyzdar, dereý “102” nómirine habarlasyńyzdar, – dedi, Almaty qalasy PD esirtki qylmysyna qarsy kúres basqarmasynyń bastyǵy Murat Jumabaev. Qazirgi tańda tergeý jalǵasýda, ustalǵandardyń zańsyz áreketteriniń barlyq mán-jaıy anyqtalýda.