Almatyda qysqy marafon ótti. Mereıtoılyq jarysqa 2500-nan astam adam qatysty
Almatyda qala ákimdiginiń qoldaýymen jyl saıynǵy Winter Run 2024 jarysy ótti. Sharaǵa salaýatty ómir saltyn ustanatyn 10 men 80 jas aralyǵyndaǵy 2 500-den astam adam qatysty.
Dástúrli túrde jyl saıyn ótetin marafonǵa qatysýǵa nıet bildirgender kún raıynyń salqyndyǵyna qaramastan kóp jınaldy. Jeksenbiniń tańyn júgirýden bastaǵan almatylyqtardyń arasynda túrli salada qyzmet etetin mamandardan bastap, kásibı sportshylarǵa deıin bar.
Sóre syzyǵy ál-Farabı dańǵylyndaǵy «Nurly Taý» BO-dan bastalyp, dál osy jerde aıaqtalatyn jarysqa qatysýshylar 3 qashyqtyq boıynsha baq synasty. Balalar 3 shaqyrymǵa júgirse, eresekter 10 shaqyrymǵa, al skandınavıalyq júrispen aınalysatyndar 7 shaqyrym qashyqtyqta básekege tústi.
Uıymdastyrýshylar marafonǵa qatysýshylar jyl ótken saıyn artyp kele jatqanyn aıta kelip, is-sharanyń joǵary deńgeıde ótýine atsalysqan barlyq sala qyzmetkerlerine alǵys bildirdi.
– Almatyda júgirýden ótetin jarystardyń barlyǵyn «Birinshi bolý – batyldyq» korporatıvtik qory uıymdastyrady. Búgingi Winter Run 2024 marafony bıyl onynshy ret ótkizilip otyr. Ótken jyly Almaty marafonynda skandınavıalyq júristegi jarys boıynsha Qazaqstannyń rekordyn ornatqan bolatynbyz. Sportshylardyń qatary jyl sanap artyp keledi. Sondyqtan mundaı is-sharalar elimizdegi buqaralyq sportty damytýǵa úlken septigin tıgizedi dep oılaımyn. Sonymen qatar, biz osy is-sharany joǵary deńgeıde ótýine atsalysqan Almaty qalasynyń Polısıa departamentine, dárigerler men eriktilerge erekshe alǵys bildiremiz, – deıdi Almaty marafonynyń race-dırektory Saltanat Qazybaeva.
Jarys alańynan jasty da, jasamysty da, qoldaryna arnaıy súıenetin taıaqtardy paıdalaný arqyly jaıaý serýendeýge kelgen zeınetkerlerdi, tipti sheteldik týrıserdi de kezdestirýge bolady.
– Zeınetkermin, jasym 72-de. Belsendi ómir súrý ortalyǵynyń múshesimin. Biz sıaqty úlken kisiler úshin ortalyǵymyzda túrli sharalar ótip turady. Mine, búgingi jarys solardyń biri. Qysqy marafonǵa osymen ekinshi ret qatysyp otyrmyn. Sportpen shuǵyldanǵan adam únemi kóńildi júredi, ómirge degen qushtarlyǵyńdy arttyrady. Densaýlyqqa paıdasy zor. Zamandastarymnyń barlyǵyn sportpen júıeli túrde aınalysýǵa shaqyramyn, - deıdi Fatıma BATYRBEKOVA.
Grıg LI, AQSH-tyń Vınchester qalasynan kelgen týrıs:
- Almatyǵa kelgenime 6 aı boldy. Bul qalada meniń dostarym kóp. Almatynyń tabıǵaty da, halqy da erekshe! Búgin meniń dostarym jarysqa qatysýda. Dostarymdy qoldap-qolpashtaýǵa keldim. Keremet jarys ótip jatyr!
Kópshilik arasynan ulyna qoldaý bildirýge kelgen teatr jáne kıno akteri Áset IMANǴALIULYN kezdestirip, sózge tarttyq.
– Ulym Zańǵar Imanǵalıulyna qoldaý bildirýge keldim. Taldyqorǵandaǵy qazaq túrik-lıseıinde oqıdy. Sol oqý ornynan Mıras aǵaılarymen birge kelip, 9 bala qatysyp jatyr. Balam jylda qatysady. Biraq, men ýaqytym bolmaı kele almaıtynmyn. Búgingi shara qatty unap tur. Men tipti budan keıin januıammen qatyssam ba degen sheshim qabyldadym. Sport – densaýlyqtyń kepili, salaýatty ómir súrýdiń negizgi kilti. Jumys babymen júrip, Almatyda ótetin sporttyq sharalardy, osyndaı ádemi sátterdi biz jiberip alady ekenbiz. Halyqtyń ortasynda, kópshilikpen birge júrgenniń ózi bir ǵanıbet qoı! Shynymdy aıtsam, ózime-ózim rıza bolyp turmyn. Almaty qalasy ákimdigine jáne osy sharany uıymdastyryp jatqan azamattarǵa kóp rahmet aıtqym keledi, – deıdi óner ıesi.
Óz zamandastarynyń arasynan oza shaýyp, máre syzyǵyn birinshi bolyp kesken Dana DİLSHAT úzdikter qatarynan kórindi.
Sýretti túsirgen - Aıgýl Kolýmbetova
– Erekshe qýanyp turmyn. Márege alǵashqy bolyp men keldim. Óte keremet shara ótti. Marafonǵa 3 jyldan beri qatysamyn. Sportpen shuǵyldanǵandy qatty jaqsy kóremin. Uıymdastyrýshylarǵa alǵysym sheksiz, – deıdi Nazarbaev zıakerlik mektebiniń 7 synyp oqýshysy.
İs-shara barysynda jankúıerlerge arnap ystyq shaı men demeýshilik bildirgen kompanıalar atynan taǵam usynyldy. Al Almaty aspanyn ánge bólegen áýen kópshiliktiń sportqa degen qyzyǵýshylyǵyn arttyryp, kóńilin kóterdi. Alańnyń medısınalyq shatyrlarmen qamtylyp, tártip saqshylarynyń jiti baqylaýynda bolýy da marafonnyń óz deńgeıinde uıymdastyrylǵanyn kórsetti.
Aıta keteıik, bıyl Almatyda Summer Run, City Run, Sora Almaty Run, Tau Jarys, Almaty Half Marathon jartylaı marafony, velojarys – Almaty city Týry jáne jyldyń eń mańyzdy oqıǵasy – Almaty Marathon sekildi birneshe maýsymdyq jarystar ótedi. İs-sharalar kúntizbesimen Almaty marafonynyń saıtynan tanysýǵa bolady.
Jarys sońynda marafon jeńimpazdary aqshalaı syılyqtarmen, maqtaý qaǵazdarymen jáne medaldarmen marapattaldy.