Bul týraly qalanyń bas sanıtar dárigeri Jandarbek Bekshın baspasóz otyrysynda málimdedi
Almatyda Jańa jyldan keıin pandemıanyń besinshi tolqyny bastalýy múmkin. Al naýryz aıynyń ortasynda indettiń órshýi yqtımal, deıdi qalanyń bas sanıtar dárigeri Jandarbek Bekshın. Abyroı bolǵanda, «omıkron» shtamy ázirge tirkelmegen, dep habarlaıdy Almaty-akshamy.kz
Búginde Almatyda epıdahýal turaqtalyp keledi. Sebebi megapolıste ujymdyq ımýnıtet 58,4 paıyzǵa jetti. Jalpy, jyl basynan beri koronavırýsqa 164 477 almatylyq shaldyqqan. Búginde ekpeniń arqasynda kórsetkish aıtarlyqtaı tómendep, táýligine 30-dan asa naýqas tirkelýde. Bul týraly qala ákimi Baqytjan Saǵyntaev málimdedi. Degenmen kórshi memleketterde dendegen «omıkron» shtamy bizdiń elimizde de paıda bolýy yqtımal deıdi shahar basshysy. Sondyqtan halyqty jappaı revaksınalaý naýqanyna qatysýǵa shaqyrdy.
Koronavırýstyń jańa mýtasıalary ekpe alǵan nemese indetke shaldyǵyp, jazylǵan adamdarǵa da qaıta juǵyp jatyr. Sondyqtan barynsha vaksınanyń kúsheıtkish mólsherin alyp, ımýnıtetti nyǵaıtqan durys deıdi dárigerler. Qalalyq qoǵamdyq densaýlyq basqarmasynyń basshysy Narıman Tabynbaevtyń aıtýynsha, megapolıs pandemıanyń kezekti tolqynyna daıyn. Búginde qalada ekpeniń 585 700 dozasy bar. Onyń ishinde «Spýtnık-V» ekpesiniń 33 756, QazVac-tyń 50 myń, VeroCell-diń 223 myń 755 jáne Pfizer-diń 277 987 mólsheri tirkelgen. Pfizer-men ımmýndalyp jatqan júkti kelinshekter sany da kóbeıip keledi. Osy rette mamandar vaksına óziniń tıimdiligin dáleldedi deıdi. Sebebi ǵylymı zertteý jumystarynyń nátıjesinde ekpe alyp, bosanǵan áıelderdiń nárestelerinde antıdene biraz ýaqyt saqtalatyny anyqtalǵan.
«Qazir 50 shaqty áıeldiń balasynda antıdene bar ekeni belgilengen. Biraq qashanǵa deıin saqtalatyny áli tekserilip jatyr. Qazir 3-4 aıǵa deıin onyń kúshi saqtalady delinýde. Ol ǵylymı zertteýge baılanysty», – dedi Almaty qalalyq qoǵamdyq densaýlyq basqarmasynyń basshysy Narıman Tabynbaev.
Bul rette álem ǵalymdary da ekpe balalardy vırýstan 100 paıyz qorǵaıtynyn dáleldegen edi. Búginde elimizde koronavırýstyń taralýy boıynsha ahýal turaqtaldy. Degenmen Nur-Sultan qalasynda qaıtadan naýqastar sany kóbeıip ketti. Sáıkesinshe, búgin «sary» aımaqqa ótti. Bul tizimde Pavlodar men Soltústik Qazaqstan oblystary da bar. Al qalǵan 14 óńir «jasyl» aımaqta ornalasqan.