Qala kúni men Qazaqstan Respýblıkasy Táýelsizdiginiń 30 jyldyǵyn merekeleý aıasynda Almaty qalasynyń kásipkerlik jáne ınvestısıalar basqarmasy megapolıstiń jetekshi joǵary oqý oryndarymen birlesip, bolashaǵy zor jastarǵa arnalǵan «Business Day Almaty» praktıkalyq semınaryn ótkizdi.
Eki kún boıy keń aýdıtorıa aldynda sóz sóıleýde baı tájirıbesi bar bıznes-trenerler, koýchter jáne kásipkerler stýdentterge bıznes-úlgilerdi qurýdaǵy eń sońǵy úrdister týraly aıtyp berdi. SMM-strategıany qurýda jáne maqsatty aýdıtorıany aıqyndaýda jumys isteıtin quraldarmen bólisti. «Amazon, Ebay jáne Etsy» álemdik alańdarynda satýdyń negizgi qaǵıdattaryn atap ótti, isin jańa bastaǵan kásipkerlerdiń negizgi qatelikterin taldady, tyńdaýshylardyń ózekti suraqtaryna jaýap berdi.
«Búginde qazaqstandyq bilim men ǵylymnyń aldynda aýqymdy mindetter tur. Memleket basshysy jaqynda Qazaqstan halqyna arnaǵan Joldaýynda atap ótkendeı, qazirgi jastardyń «Jańa aǵymdardy ustanyp qana qoımaı, bir qadam alda bolýy, trendter qalyptastyrýy mańyzdy». Bul turǵyda sizderde, aldyńǵy býyndarǵa qaraǵanda, áldeqaıda úlken artyqshylyqtar bar. Mysaly, qazirdiń ózinde siz «BJK-2025» memlekettik baǵdarlamasy aıasynda baıqaýǵa qatysyp, 2 mln. teńgeden 5 mln. teńgege deıin grant utyp ala alasyz. Qatelikterden qoryqpańyz! Ósý úshin jańa múmkindikterdi izdeńiz, baıqap kórińiz jáne jasańyz, sonda siz mindetti túrde tabysty urpaqqa aınalasyz», – dedi Almaty qalasy kásipkerlik jáne ınvestısıalar basqarmasynyń basshysy Erkebulan Orazalın óziniń quttyqtaý sózinde.
Onyń aıtýynsha, bıyl Almatyda «Bıznestiń jol kartasy – 2025» baǵdarlamasy boıynsha 512,9 mln. teńgege 162 joba, onyń ishinde 186,4 mln. teńgege ınovasıalyq 56 joba grant alǵan.
Almaty qalasy kásipkerlik jáne ınvestısıalar basqarmasy basshysynyń orynbasary Qanat Saǵyndyqovtyń aıtýynsha, «ALMATY Business-2025» kásipkerlikti damytý óńirlik baǵdarlamasyn júzege asyrý aıasynda «Qoldaý» kásipkerlik ortalyǵy kásipkerler men bıznes bastamasy bar tulǵalar úshin onlaın jáne oflaın formattarda tegin oqytý júrgizetinin atap ótti. Ol úshin edu.qoldaý.kz ınteraktıvti oqytý platformasy quryldy. Onda tirkeýden ótý kezinde kýrstarǵa («Qoldaý Start», «Qoldaý Sýstem» salalyq kýrstaryna jáne «Qoldaý Profi» tereńdetilgen kýrstaryna), sondaı-aq oqytý beınerolıkterine, túrli bıznes-prosester boıynsha daǵdylardy pysyqtaýǵa arnalǵan sımýlásıalarǵa, kóptegen oqý materıaldaryna ruqsat beriledi.
«Búgingi tańda «Qoldaý» kásipkerlik ortalyǵynda 11 myńnan astam tyńdaýshy bilim aldy. Jaqyn arada ortalyq «Jastar kásipkerligi» atty jańa baǵytty iske qosady. Ol oqytýdyń praktıkaǵa baǵyttalǵan sıpatyna ıe. Onyń qorytyndysy boıynsha, stýdentterde tolyqqandy bıznes-model jáne bolashaq ónimniń prototıpin túsiný qalyptasady degen senim bar. Sizder kásipkerlikti qoldaýdyń memlekettik sharalary, halyqty jumyspen qamtý ortalyǵynyń baǵdarlamalary jáne bıznes-ıdeıalaryńyzdy iske asyrý múmkindikteri týraly bile alasyzdar», – dedi Q.Saǵyndyqov.