Almaty qalasynda jastardyń qarjylyq saýattylyǵyn arttyrýǵa baǵyttalǵan mańyzdy joba óz máresine jetti.
Prıntmedıa tehnologıalar koleji oqý-ádistemelik birlestiginiń uıymdastyrýymen jáne «AMANAT» partıasynyń qoldaýymen ótken «Qarjylyq saýattylyq – tabys kilti» atty qalalyq baıqaý jastardyń qarjy mádenıetin damytýǵa jáne «Qaryzsyz qoǵam» ulttyq jobasynyń maqsattaryn qoldaýǵa arnaldy, - dep habarlaıdy Aqshamnews.kz.
Baıqaýdyń negizgi maqsaty – stýdentter arasynda qarjylyq saýatty ómir saltyn qalyptastyrý, jeke qarjyny tıimdi basqarýǵa baýlý jáne sıfrlyq dáýirdegi qarjy quraldaryn durys paıdalanýǵa úıretý bolyp tabylady.
İs-sharaǵa Almaty qalasyndaǵy tehnıkalyq jáne kásiptik bilim berý uıymdarynyń stýdentteri belsene qatysty. Olar qarjy taqyrybyna arnalǵan qysqametrajdy beınerolıkterin usynyp, jeke tájirıbesi men shyǵarmashylyq kózqarasyn kórsetti. Jastar óz jumystarynda alǵashqy búdjetti qalyptastyrý, sıfrlyq teńgeniń múmkindikteri, qarjylyq qatelikterdiń aldyn alý jáne óz-ózine ınvestısıa salý sıaqty ózekti máselelerdi qozǵady.
Baıqaý qorytyndysy boıynsha úzdik beınerolıkter iriktelip, jeńimpazdar dıplomdar men kýboktarmen marapattaldy. Sonymen qatar, belsendi qatysýshylarǵa arnaıy alǵys hattar tabystaldy. İs-shara barysynda jastar qarjyny tıimdi basqarý, tabys pen shyǵyndy josparlaý jáne sanaly tutyný mádenıetiniń mańyzyn tereń túsindi.
Bul bastama elimizde «AMANAT» partıasynyń bastamasymen júzege asyrylyp jatqan «Qaryzsyz qoǵam» ulttyq jobasynyń jalǵasy retinde jastar arasynda qarjylyq mádenıetti keńinen nasıhattaýǵa múmkindik berdi. Atalǵan joba aıasynda respýblıka boıynsha 845 myńnan astam azamat, sonyń ishinde 18 myńnan asa almatylyq, qarjylyq saýattylyq boıynsha tegin oqýdan ótip, jeke búdjetti basqarý men qaryzdyq júktemeni azaıtý daǵdylaryn meńgerdi.
«Qarjylyq saýattylyq – tabys kilti» baıqaýy jastardyń qarjylyq mádenıetin qalyptastyrýǵa, jaýapty sheshim qabyldaýǵa jáne ekonomıkalyq turǵydan erkin bolýǵa baǵyttalǵan mańyzdy qadam boldy.