Almaty Qalalyq kardıologıalyq ortalyǵynda kálsılengen arterıany emdeýdiń zamanaýı tehnologıasy engizildi, - dep habarlaıdy Aqshamnews.kz.
Almaty Qalalyq kardıologıalyq ortalyǵynyń baspasóz qyzmetiniń málimetinshe, keıingi jyldary dárigerlerge kálsılengen arterıalyq ateroskleroz dıagnozy qoıylǵan pasıentter jıi júginedi. Bul qan tamyry qabyrǵalary qataıyp, ıilgishtigin joǵaltyp, standartty balondyq angıoplastıkamen olardy keńeıtý múmkin bolmaıtyn jaǵdaı.
Ádette arterıa tarylǵan kezde emdeý úshin balon qoldanylady: ol zaqymdanǵan tamyr bóligine engizilip, 10-14 atmosfera qysymmen úrlenedi. Bul tamyrdy keńeıtip, qalypty qan aǵymyn qalpyna keltiretin stent ornatýǵa múmkindik beredi.
«Alaıda aıqyn kalsınoz kezinde jaǵdaı áldeqaıda kúrdeli. Kálsılengen túıinshektiń tyǵyzdyǵy sondaı, ony 20 atmosferaǵa deıingi qysymda da keńeıtý múmkin emes, osylaısha balon tolyq ashylmaı qalady. Mundaı jaǵdaıda qysymdy 30 atmosfera ne odan joǵary deńgeıge deıin arttyrý arterıanyń jarylý qaýpin týǵyzady, sondyqtan bul prosedýra óte qaýipti», - deıdi ıntervensıalyq kardıologıa bólimshesiniń meńgerýshisi Orazbek Sahov.
Bul máseleniń sheshimi - jańa tehnologıa, últradybystyq lıtotrıpsıa boldy.
Prosedýra kezinde zaqymdanǵan aımaqqa arnaıy balon engiziledi. Balon úrlengen kezde onyń ishinde últradybystyq ımpúls túziledi, ol kálsılengen túıinshekti ydyratady. Tolqyn kálsıge baǵyttalǵan áser etedi de, onyń qurylymyn buzady, al tamyr qabyrǵasynyń jumsaq tinine zaqym keltirmeıdi.
Mundaı óńdeýden keıin balon qaıta úrlenip, tamyr ońaı keńeıedi, stent ornatý qaýipsiz ári tıimdi ótedi.
Últradybystyq lıtotrıpsıa – arterıanyń jarylý qaýpinsiz kálsı shógindilerin tıimdi joıýǵa, aýyr kalsınoz kezinde de stentti sátti ornatýǵa jáne qan aınalymyn jyldam qalpyna keltirýge múmkindik beretin ınovasıalyq ádis.
«Bizdiń ortalyqta últradybystyq lıtotrıpsıa ádisimen úsh sátti ota ótkizildi. Barlyq jaǵdaıda arterıa tolyq ashylyp, stent esh qıyndyqsyz ornatyldy. Pasıentterdiń jaǵdaıy qanaǵattanarlyq, qan aınalymy qalpyna keldi, aýyrsyný belgileri joıyldy», - deıdi Orazbek Sahov.
Qalalyq kardıologıalyq ortalyqta engizilgen zamanaýı tehnologıa dárigerlerge qan tamyrynyń kúrdeli zaqymdanýynyń kezinde de tıimdi emdeýge múmkindik berip, pasıentterge qaýipsiz ári senimdi em alýǵa jol ashty.