Tájirıbeler 2022 jylǵy mamyrdyń sońyna deıin jalǵasady.
Qazaqstannyń jas áskerı ushqyshtary Balqash oqý-avıasıalyq ortalyǵynda jattyǵý ushýlaryn oryndaıdy, dep habarlaıdy Almaty-akshamy.kz.
«Memleket basshysy Qasym-Jomart Toqaevtyń Qazaqstan áskeriniń kadrlyq áleýetin arttyrý jónindegi tapsyrmasyn iske asyrý sheńberinde Áýe qorǵanysy kúshteri áskerı ınstıtýtynyń tórtinshi kýrs kýrsanttary Balqash oqý-avıasıalyq ortalyǵynda jattyǵý ushýlaryn oryndaıdy», - delingen Qorǵanys mınıstrliginiń baspasóz qyzmetiniń habarlamasynda.
Maıdan avıasıasynyń bolashaq ushqyshtary bul joly 2021 jylǵy naýryzda oqý-avıasıalyq ortalyqqa ákelingen Aero L-39 Albatros ushaqtarynyń jańartylǵan nusqasynda daıyndalatyn bolady.
Kýrsanttar tájirıbeli nusqaýshylardyń basshylyǵymen ushý, bıiktikti baǵyndyrý, 300 km/saǵ jyldamdyqpen sheńber jasap ushý jáne qoný sıaqty ushý tehnıkalaryn meńgeredi.
«Ushaqtyń bul túrimen daıyndyq kezinde tájirıbesi mol ushqysh-nusqaýshylar teorıalyq bilimderimizdi ushý daǵdylaryna jetildirýge kómektesedi. Ushý elementterin óz betinshe oryndaý óz qabiletimizge degen senimdilikti arttyryp, bolashaqta jetistikterge jetýge yntalandyrady», – dep atap ótti 4 kýrs kýrsanty Dıas Shámenov.
Kýrsanttar áskerı taǵylymdama kezeńinde is júzinde ushýdy oryndaýdan ózge ushý jumysyn retteıtin qujattardy, erekshe jaǵdaıdaǵy is-qımyl jónindegi nusqaýlyqtardy zerdeleıdi.
Mundaı ushý tájirıbesi joǵary oqý ornyn bitirýshilerdi oqytýdyń mańyzdy kezeńi bolyp tabylady. Sondaı-aq, bul tájirıbeler 2022 jylǵy mamyrdyń sońyna deıin jalǵasady. Áskerı oqý ornyn bitirgen kezde jas áskerı ushqyshtardyń ushý tájirıbesi 80 saǵattan asatyn bolady.
