Abaı atyndaǵy Qazaq ulttyq opera jáne balet teatrynda Dj.Pýchchınıdiń «Madam Baterfláı» úsh bólimdi operasy jańartylǵan qoıylymmen sahnalyp jatyr.
Abaı atyndaǵy Qazaq ulttyq opera jáne balet teatrynda «Madam Baterfláı» operasynyń jańartylyp sahnalanýyna oraı baspasóz-konferensıasy ótti. Jıynǵa Abaı atyndaǵy QazUOBT dırektory Nurbaqyt Bókebav, qoıýshy rejıssór Natalá Kagadıı, qoıýshy dırıjer jáne Abaı atyndaǵy QazUOBT bas dırıjeri Erbolat Ahmedárov, qoıýshy sýretshi (senografıa) Vladımır Ponomaróv qatysty.
- Bizdiń Abaı atyndaǵy Qazaq ulttyq opera jáne balet teatrynda bárińizge belgili, álemdegi eń kóp qoıylatyn spektáklderdiń biri – «Madam Baterfláı» operasy alǵash ret 1972 jyly qoıylǵan. Ol kezde rejıseri A.Jdanov, al sýretshi Gúlfaırýs Ysmaıylova boldy. Chıo-CHıo-sandy alǵashqy bolyp bizdiń opera salasynyń korıfeıleri – Kúlásh Baıseıitova, Roza Jamanova, Rahıma Jubatyrova oryndaǵan. Bir ereksheligi spektákl alǵashqy kúnnen qazaq tilinde júrgen. Sol jyldardan beri tolassyz júrip jatqan spektákl Qazaqstan kórermenderiniń kózaıymyna aınaldy. Sonsha ýaqyt ótkennen keıin zaman talabyna saı jańalap, qoıylymǵa arnaıy toqtaldyq. Ol úshin syrttan kisi shaqyrmaı, ózimizdiń rejıser Natalá Kagadııge tapsyrdyq, – dedi Abaı at. QazUOBT dırektory Nurbaqyt Bókebav.
Sondaı-aq, ol teatrdyń kelesi jylǵa qoıǵan josparlaryn da aıtyp ótti:
- 2023 jyl Abaı atyndaǵy Qazaq ulttyq opera jáne balet teatryna 90 jyl tolady. Osyǵan oraı, kelesi teatr maýsymyn úlken festıválmen ashý josparda bar. Mádenıet jáne sport mınıstrliginiń jospary boıynsha biz jylyna 2-3 jańa qoıylym qoıýymyz kerek. Sondyqtan kelesi jyly biz «Jumbaq qyz» operasyn qazaqsha sahnalaý kózdelip otyr. Baletten «Jızel» qoıylymy bar. Qazir tehnıkalyq múmkindikterdi paıdalan otyryp zaman talabyn saı qoıylymdar kórsetý – bizdiń alǵa qoıǵan maqsattarymyzdyń biri. Sonymen qatar, bizde balalarǵa arnalaǵan baletter jetispeıdi. Sol sebepti «Aldarkóse» baletimen teatrymyzdyń repetýaryn tolyqtyrýdy josparlap otyrmyz, – dedi ol.
Spektákl rejıseri N. Kagadıı ony jańartý barysynda qandaı jumystar istelgenin habarlady.
- Jalpy, tańǵajaıyp Japonıa mádenıetin kórsetetin operalar kóp emes. Sondyqtan «Madam Baterfláı» qoıylymyn jańartý barysynda qandaı da bir zaman jańashyldyǵyna tym artyq berilý durys bolmas edi. Bizdiń qolymyzda dástúrli kıimderi bar dástúrli qoıylym boldy. Ondaǵy ulttyq erekshelikti saqtaı otyryp, spektáklge jańa kózqaraspen qaraýǵa tyrystyq. Ol úshin Japonıanyń «Kabýkı» jáne «No» dástúrli teatrlarynyń elementterin qoldandyq. Naqty aıtqanda, kıim úlgisin jasaýda osy teatrlardyń tájirıbesine súıendik. Sonymen qatar, «No» teatry óz qoıylymdarynda betperde kıýmen erekshelenedi. Biz de epızodtardyń birinde japon betperdelerin qoldandyq. Qozǵalys (plasıka) týraly da aıtpaı ótýge bolmaıdy. Japon ártisteri men eýropa ártisteriniń sahna qozǵalysy bir-birinen erekshelenedi. Bizdiń ónerpazdardyń qozǵalysy olardan bólek. Sondyqtan sahna tili, sahna qozǵalysyna osy qoıylymda asa mán berdik, – dedi qoıýshy rejıssór Natalá Kagadıı.
Aıta ketken jón, «Madam Baterfláı» operasy – opera óneriniń óte áserli injý-marjany. Abaı atyndaǵy Qazaq ulttyq opera jáne balet teatrynyń sahnasynda jańa senografıasy men kostúmderi, biregeı ınterpretasıasy úılesim tapqan qoıylym jańa nusqasynyń tusaýkeseri ótip, teatr repertýarynda qaıta jańǵyrdy. Operanyń sújeti – tańǵajaıypqa toly elderdiń biri, mádenıeti men dástúri arqyly erekshelenetin Japonıada ótedi.