Majarstannyń Seged qalasynda ótken para kanoedan lısenzıalyq álem chempıonatynda Janyl Baltabaeva Parıj-2024 Paralımpıadasyna joldama jeńip aldy, dep habarlaıdy almaty-akshamy.kz
Chempıonattyń V fınalynda (VL3 klas) óner kórsetken qazaqstandyq sportshy 200 metr qashyqtyqty 1:05.83 sekýndta baǵyndyryp, márege ekinshi bolyp jetti. Osy básekede polshalyq Monıka Kýkla 1:05.45 sekýnd nátıjesimen birinshi, al fransıalyq Elea Charvet 1:07.33 nátıjesimen úshinshi bolyp jetti. Janyl el qorjynyna Paralımpıadanyń 12-shi lısenzıasyn saldy.
Buǵan deıin para kanoedan Spataı Bıbarys, para paýerlıftıngten Davıd Degtárev, para jeńil atletıkadan Dastan Muqashbekov, voleıboldy otyryp oınaýdan ulttyq qurama, para oq atýdan Erkin Ǵabbasov, para júzýden úsh joldama, para taekvondodan Nurlan Dombaev, Kamılá Dosmalova jáne Nyshan Ómiráli alǵan bolatyn. Parıj-2024 Paralımpıadasy tamyzdyń 28-i men 8-shi qyrkúıek aralyǵynda ótedi.