Qańtarda ótetín ŪBT-ǵa qatysu úshín ótínísh qabyldau 22 jeltoqsanda bastalyp, 30 jeltoqsanǵa deıín jalǵasady. ŪBT-ǵa tírkelu Ūlttyq testíleu ortalyǵynyń app.testcenter.kz saıtynda nemese UTO qosymshasy arqyly júrgízíledí, - dep habarlaıdy aqshamnews.kz tílshísí.
Test qashan ótedí?
Testíleu 10 qańtar men 10 aqpan aralyǵynda ótedí.
Eske salaıyq, qańtardaǵy ŪBT-ǵa shartty túrde aqyly negízde kúndízgí oqu nysany boıynsha joǵary oqu oryndaryna qabyldanǵan, jazǵy ŪBT nátıjelerí boıynsha shektí ball jınamaǵandar, shyǵarmashylyq bílím beru baǵdarlamalarynyń toptarynan aqyly negízde basqa daıyndyq baǵyttaryna, pedagogıkalyq baǵytqa aqyly negízde auysqysy keletínder, ótken jylǵy mektep jáne kolledj túlekterí, QR azamaty bolyp tabylmaıtyn ūlty qazaq tūlǵalar, shetelde bílím alǵan QR azamattary, sondaı-aq mektep bítíretín túlekter joǵary oqu oryndaryna aqyly negízde túsu úshín qatysady.
2026 jyly ŪBT formaty ózgere me?
2026 jyly Ūlttyq bíryńǵaı testíleudíń formaty ózgeríssíz saqtalady. ŪBT qūrylymy būrynǵy qalpynda qalady: talapkerler úsh míndettí pándí jáne tańdauy boıynsha ekí beıíndík pándí tapsyrady. ŪBT tapsyrmalarynyń jalpy sany – 120.
Sonymen qatar testíleu baǵdarlamasynda barlyq talapkerge kalkulyator, hımıyalyq elementterdíń perıodtyq kestesí jáne tūzdardyń erígíshtík kestesí qoljetímdí bolady.
Testíleu uaqyty – 4 saǵat (240 mınut). Būl rette erekshe bílím beru qajettílíkterí bar balalar úshín ūsynylatyn qosymsha 40 mınut uaqyt saqtalatynyn aıta ketu kerek.
