Almaty qalasynda jyldy qorytyndylaǵan "Beles 2025 – jyldyń sport jetistikteri" festıvali uıymdastyryldy. Bul mańyzdy sporttyq-buqaralyq is-sharaǵa qala turǵyndary, áýesqoılar men salaýatty ómir saltyn ustanatyn belsendi azamattar qatysty.
Festıváldiń negizgi maqsaty — salaýatty ómir saltyn nasıhattaý, buqaralyq sportty damytý jáne qala turǵyndaryn dene shynyqtyrýǵa turaqty túrde tartý boldy. Festıvál aıasynda qatysýshylar fızıkalyq múmkindigin synap, osy jyldaǵy sport salasyndaǵy jetistikterin qorytyndylady.
Jarysqa kásibı sportshylarmen qatar áýesqoılar da qatysty. Sonymen birge balalarǵa, jasóspirimderge jáne múmkindigi shekteýli jandarǵa arnalǵan arnaıy tapsyrmalar usynyldy.
"Beles 2025" sport festıvali – bul jyl boıy el namysyn qorǵap, halyqaralyq arenada Qazaqstannyń atyn shyǵarǵan sportshylarǵa kórsetilgen qurmettiń belgisi. Bul sporttyq is-shara jyldyń qorytyndysyn shyǵaratyn mańyzdy mejege aınaldy. Festıvál aıasynda 12 sporttyq lokasıa uıymdastyryldy. Ár orynda qatysýshylar arnaıy fýnksıonaldyq jattyǵý oryndap, jınaǵan upaıyn medalǵa aıyrbastaý múmkindigine ıe boldy", - dedi festıváldiń mańyzyna toqtalǵan "Qoǵamdyq pikir" sport lıgasynyń ókili Evgenıı Shamraı.
Onyń aıtýynsha, festıválde ár sporttyq aımaqta aılyq formatta jasalǵan arnaıy bannerler qoıyldy. Bannerler gazet stılinde bezendirilip, bir jyl ishinde Qazaqstan sportshylarynyń álemdik arenadaǵy jetistikterin kórsetedi.
"Ár aı belgili bir sport túrine arnaldy: mysaly, qańtar – boks, aqpan – aýyr atletıka jáne t.b. sport salalary. Al qorytyndy - on ekinshi bannerde Qazaqstan sportshylarynyń bir jylda jeńip alǵan jalpy medal sany men halyqaralyq reıtıńtegi orny kórsetildi.
Festıváldiń basty maqsaty – buqaralyq sportty damytý jáne turǵyndardy salaýatty ómir saltyna tartý", - dedi Evgenıı Shamraı.
"Bul is-shara men úshin úlken motıvasıa boldy. Osyndaı jarystar jastardy sportqa baýlyp, múmkindigimdi ashýǵa kómektesedi dep oılaımyn. Kelesi jyly da mindetti túrde qatysyp, búgingi nátıjemdi jaqsartqym keledi", - deıdi qatysýshy İlıas Kanebaı.