Bilim jáne tárbıe berý boıynsha oqý-ádistemelik nusqaýhat ázirlendi
Aldaǵy oqý jylynan bastap dene shynyqtyrý jáne tehnologıa páni qyz jáne ul balalar úshin bólek ótkiziledi. Bul týraly Bilim jáne ǵylym mınıstrligi mektepke deıingi jáne orta bilim komıtetiniń tóraǵasy Gúlmıra Kárimova málim etti, dep habarlaıdy Almaty-akshamy.kz.
«Aldaǵy oqý jylynda bilim jáne tárbıe berý boıynsha oqý-ádistemelik nusqaýhat ázirlendi. Ol bıylǵy oqý jylynyń sońyna deıin mektepterge jetkiziledi. Jańa oqý-ádistemelik nusqaýhat mektep jasyna deıingi balalardyń qaýipsizdigin qamtamasyz etý, tárbıe jáne bilim berý berý prosesiniń sapasyn arttyrý maqsatynda qoıylǵan talaptarmen tolyqtyryldy. Erekshe qajettiligi bar balalarmen jumysty psıhologıalyq-pedagogıkalyq normalaryna sáıkes uıymdastyrý, áleýmettik turǵydan osal topqa jatatyn otbasy balalaryn mamandandyrylǵan bilim uıymdaryna qabyldaýǵa arnaıy kvota engizý jumysy júrip jatyr», - dedi Gúlmıra Kárimova Bilim jáne ǵylym mınıstrliginde ótken apparat jıynynda.
Sondaı-aq komıtet basshysy bilim berý uıymdarynyń basshylaryn rotasıalaý jumysy da jalǵasyn tabatynyn aıtty. Búginde 200 bilim berý uıymynyń basshysy rotasıalandy.
«Ózin-ózi taný pániniń oqý josparynan alynyp tastalýyna baılanysty ózin-ózi taný kýrsyn oqytý erekshelikteri týraly 19-bólimge ózgerister engizilip, mazmuny qysqartyldy. Kórkem eńbek pániniń 1-4 synyptarda eńbekke baýlý jáne beıneleý óneri, 5-9 synyptardaǵy beıneleý óneri men tehnologıa pániniń bólinýine baılanysty atalǵan pánderdi oqytýda ózgerister engizilip, tolyqtyryldy. Tehnologıa jáne dene shynyqtyrý pánderin ótkizýde synyptyń tolymdylyǵyna qaramastan uldar men qyzdar tobyna bólý týraly qaǵıda engizildi», - deıdi ol.