QR Oqý-aǵartý mınıstrliginde Memleket basshysynyń bilim berý júıesin damytýǵa baǵyttalǵan tapsyrmalaryn iske asyrý barysy jáne jańa 2023-2024 oqý jylyna daıyndyq jumystary talqylanǵan keńes ótti, dep habarlaıdy Almaty-akshamy.kz.
Memleket basshysy elimizdiń mektepterinde robot tehnıkasy, fızıka, hımıa, bıologıa, STEM pánderinen 2023 jyly myń kabınet ashýdy tapsyrǵan bolatyn. Qazirgi kúni bul jumystarǵa qatysty elimizdegi mektepterde 307 kabınet ashyldy. 248 kabınet boıynsha jetkizý jumystary júzege asýda. 1235 kabınet jabdyqtaryn satyp alý úshin konkýrstyq rásimder ótkizilýde. Bul baǵyttaǵy jumystardyń tómendigi Almaty, Atyraý, Jambyl, Qyzylorda, SHQO, BQO jáne Túrkistan oblystarynda baıqalýda, keńes barysynda atalǵan óńirlerge pándik kabınetterdi ashý jumystaryn jedeldetý ári sapaly oryndaý tapsyryldy.
QR Prezıdenti Qasym-Jomart Toqaevtyń shaǵyn qalalarda, aýdan ortalyqtarynda jáne aýyldarda jyl saıyn keminde myń mektepti zamanaýı standarttar boıynsha jańǵyrtý jónindegi tapsyrmasyn iske asyrý sheńberinde qazirgi kúni elimizde 506 mektep jańǵyrtyldy. Onyń ishinde 107 mektepte aǵymdaǵy jóndeý jumystary aıaqtaldy. 185 orta bilim berý uıymynda mektep jıhazdary jańartyldy, 201 mektep kitaphanasy men 119 mektep asqanalary jańǵyrtý jumysynan ótti. 261 mektepke týrnıket, beınebaqylaý, dabyl túımeleri ornatylyp, qaýipsizdik sharalary kúsheıtildi. Bul baǵytta Almaty, Atyraý, Túrkistan oblystarynda kórsetkish tómen.
Qazirgi kúni elimizdegi 250 mektepte kúrdeli jóndeý júrgizilip jatyr, onyń 90-y «Aýyl el besigi» baǵdarlamasymen júzege asýda. Alaıda jańa oqý jylyna deıin 35 mekteptiń jóndeý jumysy aıaqtalmaýy múmkin. Bul Abaı, Almaty, Atyraý, Jambyl, Qaraǵandy, Túrkistan, Batys Qazaqstan oblystary men Almaty qalasynda ornalasqan mektepter.
Jańa oqý jylyna daıyndyqtyń negizgi mindetteriń biri – bilim berý uıymdaryn oqýlyqtarmen qamtamasyz etý. Bul baǵytta 14 óńir 100 paıyz baspalarmen kelisim shart jasady. Aqtóbe, Soltústik Qazaqstan, Atyraý oblystarynda kelisim-shart jumysy endi aıaqtalsa, Almaty qalasy, Túrkistan, Almaty oblystarynda baspalarmen áli kelisim shart jasalmady.
Keńes qortyndysy boıynsha barlyq óńirlerdegi bilim berý basqarmalaryna Memleket basshysynyń tapsyrmalaryn sapaly oryndaý jáne jumysty jedeldetý júkteldi. Al kórsetkishi tómen oblystarǵa olqylyqtardy shuǵyl joıý sharalaryn qolǵa alý tapsyryldy.