Qazaǵym, qaıda barasyń?
M.Áýezov atyndaǵy Qazaq ulttyq akademıalyq drama teatrynda jazýshy-dramatýrg F.Zellerdiń «Jan áke» atty dramasynyń premerasy ótti. Atalmysh spektákl qarapaıym otbasynyń qıyndyqqa toly ómirin sheber kórsetedi. Kórnekti fransýz jazýshysy Florıan Zeller shyǵarmasy negizimen qazaq sahnasyna laıyqtalyp jazylǵan pesa kópshiliktiń kóńilinen shyqty.
«Teatrǵa kelýdi otbasymyzben jaqsy kóremiz. Mine, teatrdyń jańa qoıylymyn tamashalaý baqyty bizge de buıyrypty. Spektákl eki kún qatarynan anshlagpen ótti. Bul degenimiz, bekzat ónerge qyzyǵatyn jandardyń kóbeıip kele jatqanyn bildiredi. Buny kórip, biz de qýanyp jatyrmyz. Qoıylym ár jastaǵy kórermenderge oı salyp, otbasylyq qundylyqtardy áspetteýge shaqyrady. Spektáklden kózimizge jas alyp, ata-ananyń qadirin uǵynyp qaıttyq. Akterlik quram men teatr ujymyna erekshe alǵysymyzdy aıtamyz», – deıdi Aıdana Beısen esimdi kórermen.
Spektákldiń basty keıipkeri – Aqsaqal. Ómirdiń qyzyǵy men qıyndyǵyn birge ótkergen aıaýly jary Áppaq baqılyq bolady. Taǵy bir qaıǵysy – sheteldikke turmysqa shyǵyp ketken kenje qyzy. Jasy kelip, kúsh-qýat azaıyp, jady tozǵan ákeni ózinshe óbekteıtin úlken qyzy Aıjan ǵana qasynda qalady. Biraq eńbegi, bir esepten, zaıa, sebebi, ákesin «estimeıdi». Dese de, ákesine medeý bolyp, óz ómirlerin jaqsartýǵa bar kúshin salady. Alaıda, Aıjan men ákesi ómirdiń barlyq aýyrtpalyǵyn arqalap, qıyndyqtarǵa moıynsunbaı, jeńip shyǵýǵa tyrysady. Al jady tozdy demeseńiz, rýhy myqty, aqyl-oıy ornynda, qyzdarynyń taǵdyryn, ulttyq ustyndardan ajyraı bastaǵan urpaqty, qazaǵynyń bolashaǵyn oılaıtyn Aqsaqaldyń jany jalǵyz, meıirimge shóldeýli...
Psıhologıalyq turǵydan kúrdeli qoıylymda shyn ómir men bas keıipker qıalyndaǵynyń arajigin ajyratý ońaı emes, siz ben biz kútpegen ıntrıgalar da jetkilikti. Ártúrli jaǵdaılarda oınalatyn dıalogtarda qarama-qaıshy kózqarastar shıelenise túsedi.