Jambyl atyndaǵy Qazaq memlekettik akademıalyq fılarmonıasynyń 90 jyldyǵy aıasynda Tólepbergen Ábdirashev atyndaǵy QR Memlekettik akademıalyq sımfonıalyq orkestriniń «HH-25» atty festıvaliniń ashylý konserti ótti.
Halyqqa klasıkalyq ónerdi nasıhattaýdy maqsat etken fılarmonıada ekinshi ret ótip jatqan festıváldiń maqsaty - HH ǵasyrdaǵy jáne zamanaýı kompozıtorlardyń sımfonıalyq shyǵarmalaryn jaryqqa shyǵarý, ótken ǵasyrda týǵan ıdeıalardyń búgingi kúnmen úndesýin pash etý, dep habarlaıdy aqshamnews.kz.
Bıylǵy festıváldiń basty maqsaty - shet elderdegi JOO bilim alyp, jumys istep, búgingi kúni shet memleketterde etene tanylyp úlgergen qazaq jastarynyń Qazaqstanǵa kelip óner kórsetip, tyńdarmandarǵa ónerlerin nasıhattaý. Festıvál-konsertte Qanat Omarovtyń jetekshiligindegi T.Ábdirashev atyndaǵy QR Memlekettik akademıalyq sımfonıalyq orkestriniń súıemeldeýinde arnaıy Belgıadan shaqyrylǵan halyqaralyq baıqaýlardyń laýreaty, skrıpkashy Merýert Karmenova óner kórsetti.
Halyqaralyq baıqaýlardyń laýreaty, skrıpkashy Merýert Karmenova:
«Jambyl atyndaǵy Qazaq memlekettik akademıalyq fılarmonıasynyń mereıtoılyq jylynda óner kórsetý – men úshin zor mártebe boldy. Bul keshte men Karol Shımanovskııdiń №1 skrıpkaǵa arnalǵan konsertin Qazaqstan Respýblıkasy Memlekettik akademıalyq sımfonıalyq orkestriniń súıemeldeýimen, maestro Qanat Omarovtyń dırıjerlik etýimen oryndadym. Aıta keterligi, bul týyndy Qazaqstanda alǵash ret oryndaldy. Keshtiń erekshe atmosferasy, orkestrdiń joǵary kásibıligi meni qatty tánti etti jáne jadymda uzaq saqtalatyny sózsiz. Fılarmonıa ujymyna, orkestr ártisterine, maestro Qanat Omarovqa jáne meniń ónerimdi ystyq yqylaspen qabyldaǵan barlyq tyńdarmanǵa shyn júrekten alǵys bildiremin. Osyndaı rýhanı keshke qatysý men úshin úlken shabyt pen qýanysh syılady».
Konserttik baǵdarlamada álemdik sımfonıalyq ónerdiń tańdaýly týyndylary usynyldy. Fılarmonıada ótkizilgen kezekti is-shara – dáýirler men urpaqtar úniniń toǵysqan tusy, óner arqyly salynǵan rýhanı kópirdiń naǵyz kórinisi boldy. «HH25» festıvali aldaǵy 13,21 maýsym kúni konserttik baǵdarlamamen jalǵasyn tabady.
