Aqtóbede ishimdik iship alyp kólik júrgizip, jol erejesin buzǵan depýtatqa qatysty sot sheshim shyǵardy, dep habarlaıdy almaty-akshamy.kz.
Aqtóbe qalalyq máslıhatynyń depýtaty Sánıa Muratova sottyń sheshimimen alty aı merzimge kólik júrgizý quqyǵynan aıyryldy.
Aqtóbe qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda ótken otyrysqa depýtat belgisiz sebeptermen qatysqan joq.
"Besinshi qyrkúıek kúni saǵat tańǵy jetiler shamasynda azamatsha Muratova Sánıa Bulqaıyrqyzy Á. Moldaǵulova jáne Sáńkibaı batyr dańǵyldarynyń qıylysynda alty jolaqty jol belgisiniń ortasynan bólip turatyn eki tańbalaý syzyǵyn kólik quralyn basqaryp kele jatyp ótip ketken bolatyn. Ákimshilik quqyqbuzýshylyq kodeksiniń 596 babynyń 3-tarmaǵy boıynsha ákimshilik hattama toltyryldy, jol júrý qaǵıdasy boıynsha 9.2 tarmaǵyn buzdy",- dep málimdedi sot otyrysyna qatysqan Aqtóbe qalasy patrúldik polısıa ınspektory Músirep Janbolatuly
Polısıanyń aıtýynsha, ekıpaj músheleri "Leksýs" mingen depýtatty toqtatqan sátte kólikte jalǵyz ózi bolǵan. Hattamamen tolyq kelisetinin aıtqan.
Aqtóbe oblystyq soty baspasóz qyzmetiniń habarlaýynsha, azamatsha S.Muratovaǵa qatysty eki is túsken. Birinshisi jol erejesi qaǵıdasyn buzý bolsa, ekinshisi - kólikti mas kúıinde júrgizýge qatysty is.
Eske salsaq, buǵan deıin Aqtóbe qalalyq máslıhatynyń depýtaty Sanıa Muratova mandatynan bas tartý úshin saılaý komısıasyna aryz túsirgen bolatyn. Qalalyq máslıhat sheshim qabyldap, depýtattyń mandatyn merziminen buryn toqtatty. Osylaısha, mandattan da, kólik júrgizý kýáliginen de aıyryldy.