Almatyda Kardıologıa jáne ishki aýrýlar ǴZI mıokard ınfarktin bastan ótkergen, Mańǵystaý oblysynyń Jańaózen qalasynan kelgen 20 jastaǵy jigitke biregeı operasıa jasady.
Dárigerlerdiń aıtýynsha, 20 jastaǵy Álimjan óte joǵary júrek soǵý jıiligine, sonymen qatar kúıdirý, qysym sıpattaryndaǵy keýde tusy aýyrsynýlaryna shaǵymdanǵan. Mundaı júrek soǵysy alǵash ret 1,5 jyl buryn paıda bolǵan, biraq ol dárigerlerge júginbegen. Osy jyldyń maýsym aıynda jaǵdaıy nasharlap, jedel medısınalyq kómek shaqyrý kezinde aldyn ala júrektiń ıshemıalyq aýrýy, jedel mıokard ınfarkti, júrekshe fıbrıllásıanyń paroksızmaldy túri dıagnozy qoıylǵan.
Qosymsha tekserý júrgizý kezinde týa bitken júrek patologıasy (Volf-Parkınson Ýaıt sındromy) anyqtaldy. KİAǴZI jaǵdaıynda júrekti elektrofızıologıalyq zertteý jáne radıojıilikti kateterlik ablásıa usynyldy.
Naýqastyń jastyǵyn, jaqynda damyǵan mıokard ınfarktin, týa bitken júrek patologıasynyń bolýyn, sondaı-aq ólimge ákelýi múmkin mıokard ınfarktiniń qaıtalaný qaýpiniń joǵary bolýyn eskere otyryp, klınıkanyń arıtmologtary naýqasqa Reseı profesory, m.ǵ.d. Sergeı Artemenkonyń basshylyǵymen operasıa jasady.
«Biz Sergeı Nıkolaevıchpen 12 jyldan astam ýaqyt jumys istep kelemiz, ol bizdiń dárigerlermen birge júrek yrǵaǵynyń buzylýy bar eń aýyr naýqastarǵa operasıa jasaıdy. Bizde bar jabdyq álemdik standarttarǵa saı keledi jáne eń kúrdeli operasıalardy jasaýǵa, dıagnostıkalaý dáldiginiń arqasynda olardyń tıimdiligin arttyrýǵa, bolashaqta qaıtalanatyn operasıa jasaý qajettiligin azaıtýǵa, kenetten bolatyn ólim men mıokard ınfarkti, júrek qyzmetiniń jetkiliksizdiginiń damýy, ınsýlt jáne t.b. asqynýlardyń sanyn azaıtýǵa múmkindik beredi", - deıdi Basqarma tóraǵasy Marat Pashımov.
3 apta ishinde 80-ge jýyq operasıa jasalady. Olarǵa kórsetkishter – júrek yrǵaǵynyń buzylýymen baılanysty týa bitken jáne júre paıda bolǵan patologıalar. Barlyq klınıkada mundaı ozyq joǵary tehnologıalyq jabdyq joq jáne osyndaı kúrdeli pasıentterge operasıa jasaýǵa daıyn emes.
«Anyqtalǵan aýrý, onyń erekshelikterin eskere otyryp, mıokard ınfarkti jáne sol jaq qarynshanyń fraksıasynyń tómendeýi onyń ómirine qaýip tóndirgen. Sondyqtan ǴZI birinshi basshysynyń quramyndaǵy konsılıým VS EFZ jáne RCHA DPP jasaý týraly sheshim qabyldady. Biz týa bitken patologıalyq joldy joıa aldyq. Operasıa sátti ótti. Jergilikti anestezıamen jasaldy jáne operasıa kezinde naýqas esinde boldy. Operasıa shamamen 2 saǵatqa sozyldy», - deıdi profesor.
«Operasıa barysynda jaqsy nátıjege qol jetkizildi, naýqas jalpy palataǵa aýystyryldy. Boljam óte jaqsy, pasıentte ustamalardyń qaıtalaný qaýpi joq", - dedi bólimshe meńgerýshisi Baǵdat Ahyt.