Búgin Jambyl atyndaǵy Qazaq Memlekettik akademıalyq fılarmonıa solıseriniń 90-shy mereıtoılyq maýsymy ashyldy, - dep habarlaıdy Aqshamnews.kz.
Fılarmonıanyń úlken zalynda ótken aıtýly sharada óner ujymynyń jetekshi solıseri óner kórsetip, tyńdarmanǵa umytylmas mýzykalyq áser syılady.
Arnaıy baǵdarlamada kópshilik nazaryna vırtýozdy mýzykanttardyń oryndaýyndaǵy álemdik klasıka men dástúrli mýzykanyń jaýharlary usynyldy.
Óz tyńdarmandaryn janrlyq alýandyǵymen tańdaı qaqtyrǵan konsertte ujymda kóp jyldan beri tabandy eńbek etip kele jaqan Gúljan Ózenbaeva, Aıda Aıýpova, Gúlnara Qurambaeva, Ermek Qurmanaev syndy Qazaqstannyń eńbek sińirgen qaıratkerleri, mádenıet qaıratkeri Erjan Álimbetov, Ádil Nesipbaev, Maqpal Qazybekqyzy, Musa Kerimbaev syndy mádenıet salasynyń úzdikteri óner kórsetti. Ulttyq jáne álemdik klasıkanyń úılesimimen erekshelengen keshte qazaqtyń halyq áni «Aqbaqaı», Úkili Ybyraıdyń «Gákkýinen» bastap áıgili Bahtyń organǵa arnalǵan «Tokkata jáne fýga re mınor» syndy týyndylary oryndaldy.
Aıta ketý kerek, tarıh tolqynynda talaı mádenı oqıǵalarǵa kýá bolǵan fılarmonıa úshin dástúrli óner men otandyq kompozıtorlardyń eńbekterin keńinen nasıhattaý – basty qaǵıda sanalady. Bul rette ujym toqsan jyl boıy osy baǵyttan taımaı, óner bıigin baǵyndyryp keledi. Fılarmonıa solıseriniń búgingi maýsymashar konserti osy úrdiske aıqyn dálel boldy.
