Ǵylym jáne joǵary bilim mınıstri, Halyqaralyq Túrki akademıasy Ǵylymı keńesiniń tóraǵasy Saıasat Nurbek buryn zerttelmegen kóne túrki eskertkishterin tapqan túrkolog ǵalymdardy marapattady.
Ǵalymdar Nomgon keshenin Kúltegin men Bilge qaǵannyń ákesi, Túrik qaǵandyǵyn qaıta jańǵyrtýshy Qutlyq Elteris qaǵanǵa arnalǵan degen boljam jasap otyr, dep habarlaıdy Almaty-akshamy.kz Elorda.info-ǵa silteme jasap.
Ǵylym jáne joǵary bilim mınıstrliginiń málimdeýinshe, Mońǵolıanyń Ǵylym akademıasy Tarıh jáne arheologıa ınstıtýtynyń arheology A. Enhtórge, túrkolog ǵalymdar N. Bazylhan men N. Bógenbaevqa mınıstrliktiń «Ǵylymdy damytýǵa sińirgen eńbegi úshin» tósbelgisi tabystaldy. Sondaı-aq, atalǵan ǵalymdarǵa jáne Halyqaralyq Túrki akademıasynyń prezıdenti D. Qydyrálige mınıstrdiń alǵys hattary berildi.
24-tamyz kúni Nomgon (Mońǵolıa) óńirinde júrgizilgen ǵylymı arheologıalyq ekspedısıanyń nátıjeleri jarıalandy. Ekspedısıany Halyqaralyq Túrki akademıasy men Mońǵolıa Ǵylym akademıasynyń Arheologıa ınstıtýty birlesip júrgizgen bolatyn.
Nomgondaǵy qazba jumystarynyń arqasynda Ortalyq Azıadaǵy Shyǵys túrkileriniń qaǵan-knáz tıpindegi memorıaldyq keshenderin ereksheleıtin negizgi arhıtektýralyq komponentterden turatyn túrki dáýiriniń buryn belgisiz bolǵan taǵy bir eskertkishi ashyldy. Kóne túrkilik rýna jáne soǵdy tilinde qashalǵan jazýy bar bitiktastyń bir bóligi, tasbaqa tuǵyry, antropomorfty bádiz bóligi (qaǵannyń jartylaı beınesi) jáne zoomorfty músinder (arystan men qoı músinderi) jáne t.b. tabyldy.
Ǵalymdar Nomgon keshenin Kúltegin men Bilge qaǵannyń ákesi, Túrik qaǵandyǵyn qaıta jańǵyrtýshy Qutlyq Elteris qaǵanǵa arnalǵan degen boljam jasap otyr.
Mınıstr Saıasat Nurbek bul jańalyqtyń mańyzdylyǵyn atap ótip, halyqaralyq ekspedısıa múshelerine túrkologıaǵa jáne álemdik ǵylymǵa qosqan úlesi úshin alǵys bildirdi.
«Mońǵolıadaǵy Nomgon memorıaldyq kesheniniń tabylýy otandyq jáne sheteldik túrkitanýshy ǵalymdardyń tarıhı jetistigi dep esepteımin. Bizdiń elimiz, túrkitildes memleketter men álemdik qaýymdastyq úshin bul zertteý jumystarynyń mańyzy zor»,— dedi Saıasat Nurbek.
Sonymen qatar mınıstr Mońǵolıanyń Bilim jáne ǵylym mınıstrligine jáne Ǵylym akademıasyna qoldaý bildirgeni úshin alǵys aıta otyryp, keleshekte de birlesken ǵylymı jobalardy júzege asyrýǵa senim bildirdi.