Pandemıa bastalǵaly beri bul elde 5,5 mıllıonǵa jýyq adam ınfeksıa juqtyryp, kovıdke baılanysty 99 myńnan astam ólim tirkelgen.
Ótken táýlikte Germanıada COVID-19 aýrýynyń rekordtyq sany tirkeldi, dep habarlaıdy Almaty-akshamy.kz RIA Novostı agenttigine silteme jasap.
Robert Koh ınstıtýtynyń málimetinshe, 23 qarashada Germanıada koronavırýstyń 66 myń 884 jańa jaǵdaıy anyqtalǵan. Jalpy, pandemıa bastalǵaly beri elde 5,5 mıllıonǵa jýyq derlik juqtyrý jaǵdaıy jáne ınfeksıamen baılanysty 99 myńnan astam ólim tirkeldi. Dúnıejúzilik densaýlyq saqtaý uıymynyń málimeti boıynsha, Eýropa qazirgi ýaqytta koronavırýstyq ınfeksıalar sany boıynsha kósh bastap tur, olardyń sany ótken aptada 11 paıyzǵa ósti.
Buǵan deıin Germanıanyń densaýlyq saqtaý mınıstri Iens Shpan qystyń sońyna qaraı eldiń búkil halqy ne COVID-19-ǵa qarsy vaksına alady, ne ınfeksıanyń aýyr saldarymen betpe-bet keletinin aıtty.
«Múmkin, qystyń sońyna qaraı, mysqylmen aıtylyp júrgendeı, Germanıanyń ár turǵyny vaksınasıalanady, emdeledi nemese óledi», - dep boljady ol. Shpan áli kúnge deıin mindetti vaksınasıa ıdeıasyn qoldamaıtynyn atap ótti, onyń aıtýynsha, bul ujymdyq ımýnıtettiń paıda bolýyn jedeldete almaıdy.
13 qarashada el bıligi 12 myń áskerdiń bıylǵy jyldyń sońyna deıin koronavırýstyń tórtinshi tolqynymen kúresýge jumyldyrylatynyn habarlady. Atap aıtqanda, áskerıler nemis klınıkalarynda logıstıkalyq qyzmet kórsetedi jáne ýaqytsha aýrýhanalar salady.