Oljas Bektenov pen GE HealthCare basshylyǵy elimizde medısınalyq jabdyqtar óndirisin qurý jobasynyń oryndalý barysyn talqylady, dep habarlaıdy aqshamnews.kz
Qazaqstannyń Premer-mınıstri Oljas Bektenov jahandyq ınvestısıa jónindegi qazaqstandyq dóńgelek ústel aıasynda GE HealthCare kompanıasynyń Taıaý Shyǵys, Soltústik-SHyǵys jáne Ońtústik Afrıka, Túrkıa, Reseı jáne TMD elderindegi prezıdenti Kostas Delıgıannıspen kezdesý ótkizdi. Taraptar Memleket basshysy Qasym-Jomart Toqaevtyń qatysýymen qol qoıylǵan, densaýlyq saqtaý júıesin jańǵyrtýǵa jáne Qazaqstanda jergilikti óndiristik múmkindikterdi damytýǵa baǵyttalǵan Negizdemelik kelisimniń iske asyrylý barysyn talqylady.
GE HealthCare – medısınalyq qurylǵylar, dıagnostıkalyq farmasevtıkalyq preparattar, sondaı-aq sıfrlyq sheshimder men derekterdi taldaý júıelerin shyǵaratyn álemdegi jetekshi óndirýshilerdiń biri.
Kezdesýde qatysýshylar Qazaqstanda medısınalyq dıagnostıkalyq qural-jabdyqtar óndirisin lokalızasıalaý jáne klınıkalyq beınelerdiń ortalyqtandyrylǵan ulttyq muraǵatyn qurý josparlaryn talqylady. Alǵashqy baǵyt boıynsha últradybystyq dıagnostıka apparattary men ónimdiligi joǵary kompúterlik tomograftardyń jańa úlgilerin lokalızasıalaý kózdelgen. Medısınalyq beınelerdiń ortalyqtandyrylǵan muraǵaty pasıentterdiń derekterin qaýipsiz saqtap, Biryńǵaı sıfrlyq densaýlyq saqtaý keńistigin qurýǵa múmkindik beredi.
Oljas Bektenov Úkimettiń basym baǵyttarynyń biri – qazaqstandyqtardyń qaýipsizdigi men densaýlyǵyn qamtamasyz etýge baǵyttalǵan sapaly ári qoljetimdi, zamanaýı medısınalyq ınfraqurylym qurý ekenin atap ótti. Densaýlyq saqtaý salasynda sıfrlyq sheshimder engizý, aýrýhanalardy jańǵyrtý men sapaly jabdyqpen qamtamasyz etý, sondaı-aq bilikti kadrlar daıarlaý mańyzdylyǵy atap ótildi.
Óz kezeginde Kostas Delıgıannıs kompanıanyń Qazaqstan naryǵyndaǵy qatysýyn keńeıtý josparlary týraly baıandap, elimizdiń medısınalyq mekemelerinde 3 myńnan astam GE Healthcare jabdyǵy paıdalanylyp jatqanyn jetkizdi. Memlekettik onkologıalyq baǵdarlama aıasynda óńirlerde júzden astam mammograf ornatylǵan, al GE Healthcare alańdarynda 6 myń qazaqstandyq maman oqytyldy.
Kezdesý qorytyndysy boıynsha taraptar elimizdiń densaýlyq saqtaý júıesin damytýǵa baǵyttalǵan yntymaqtastyqty odan ári nyǵaıtýǵa nıetti ekenin rastady.