Joba qazir ǵylymdy komersıalandyrý satysynan sátti ótip, óndiriske daıyndalyp jatyr. Demek ósimdikten jasalǵan sút sýsyndarynyń naryqqa shyǵatyn kúni alys emes, dep habarlaıdy Almaty-akshamy.kz Habar24 -ke silteme jasap.
Árıne tabıǵı sútke eshteńe jetpeıdi. Máselen kúndelikti qoldanatyn sıyr súti qorektik zattar men dárýmenderge baı. Qunarlylyǵy taǵy bar. Tek osy sútti ishe almaıtyn adamdar bar. Unatpaǵandyqtan emes, laktozaǵa alergıasy bar jandar amalsyz sútten bas tartady. Astanalyq ǵalym Gúlnazym Ospanqulova sıyr sútine balama oılap shyǵardy. Iaǵnı, arpa, bıdaı, suly, kúrish jáne soıa ósimdiginen sút jasaıdy.
«Jobamyzda qarastyylǵan ósimdik negizdegi sút almastyrǵyshtary oılap taýyp, júzege asyryp, Qazaqstanda shyǵarmaqshy boldyq. Ǵylym qory arqyly grant utyp aldyq, aldynda zertteý ótkizdik, zertteý nátıjege alyp keldik. Sol nátıjelerdi endi qazir grant arqyly úlken óndiriske shyǵarmaqshy bolyp otyrmyz. Avtor jobanyń óndiriske tolyq daıyn ekenin aıtady. Qazir ǵylym qorynyń grantymen arnaıy jabdyqtarǵa tapsyrys berip, zaýyt ashý jumystaryn bastaǵan. Aıtýynsha, zaýyt kúnine 8 myń lıtr ósimdik sútin shyǵarýǵa qaýqarly bolmaq. Bul ishki naryq suranysyn tolyq qamtı alady»,– deıdi joba jetekshisi Gúlnazym Ospanqulova.
Ǵalymdar álem halqynyń 75 paıyzy osy laktozaǵa tózbeı alergıamen arpalysatynyn aıtady. Bizdiń elde de ásirese balalar arasynda jıi kezdese bastaǵan. Alaıda ǵalymdar onyń da jolyn tapty.
«Sapasyn baqylaý maqsatynda osy jerde óńdelip daıyndalady. M/ly myna reaktorlardy, bıdaılardy untaqtatyp, bıdaı, arpa degen sıaqty zattardyń bárin untaqtatyp, osy jerde labaratorıalyq jaǵdaıdy sapasyn anyqtaý jáne resebin daıyndaý maqsatynda mamandarmen óńdeımiz. Onyń ishindegi belok quramyna, dámdik sapasyna baılanysty, organıkalyq qasıetterine baılanysty baǵa berip, resebin ózgertý týraly mamandarmen qalaı jaqsartý maqsatynda kishkentaı seh retinde daıyndaımyz»,– deıdi komersıalandyrý jónindegi maman Marat Murathan,
Ósimdik negizindegi balamaly sút ónimderine qazirden suranys kóbeıe bastaǵan. Álemdik jýrnaldarǵa shyqqan bizdiń ǵalymnyń maqalasyn kórgen qytaılyq ǵalymdar usynys jasap, qyzyǵýshylyq tanytqan. Elimizde sútti almastyratyn sheteldik balamalar bar. Dúken sórelerinde de samsap tur. Alaıda otandyq bıologtar olardyń sapasyna kúmánmen qaraıtynyn jasyrmady. Ári baǵasyn kez-kelgenniń qaltasy kótere almaıdy. Sondyqtan otandyq ónimniń qunyn qoljetimdi etpek.