Nıderlandtyń KNMI meteorologıa búrosy eldiń jaǵalaýdaǵy aýdandarynda aýa raıyna baılanysty eskertýdiń «sary kodyn» jarıalady. Onda qalyń qar jaýady jáne joldarda kóktaıǵaq bolady dep boljanǵan, dep habarlaıdy Kazinform agenttiginiń menshikti tilshisi.
Senbi kúni Eýropanyń kóp bóligin qar basyp qaldy, al nemistiń Múnhen qalasyndaǵy áýejaı jabylyp, 700-den astam reıs toqtatyldy.
Aýstrıa men Shveısarıada da juma kúni 50 santımetrge deıin qar jaýyp, qıyndyq týyndady. Anglıa men Shotlandıanyń keı bólikterinde de qys qaharyna mindi.
Nıderland sınoptıkteriniń dereginshe, qalyń qar ásirese eldiń soltústiktegi provınsıalaryna jaýyp, bıiktigi bes santımetrge jetýi múmkin. Dúısenbi kúni de jaýyn-shashyn bolady, biraq sodan keıin temperatýra birtindep joǵarylaı bastap, qardy jańbyr almastyrady.
Osyndaı kún raıy Belgıada da bolady. Eldegi Batys jáne Shyǵys Flandrıada kóktaıǵaq bolýy yqtımal. Sondaı-aq qar jaýyp (1-3 sm aralyǵynda), ásirese batysta kóktaıǵaq bolady degen boljam bar.