Qulpybaı ÚMBETOV, zeınetker:
Jetisý aýdanyndaǵy №340 saılaý ýchaskesi de búgingi saıası salmaǵy bar eldik deńgeıdegi naýqanǵa ala tańnan saqadaı saı turdy. №103 mektep-gımnazıasynda turǵyndardyń daýys berýine barlyq jaǵdaı jasalǵany, sondaı-aq munda erekshe tártiptiń, tynyshtyqtyń ústemdik etip turǵany kózge erekshe baıqalyp turdy.
Ortada móldir jáshik. Kabınalardan daýys berip shyǵyp jatqan turǵyndar sol jáshikke ózine baǵdarlamasy unaǵan kandıdatyna daýysyn berip, belgisin soqqan qaǵazyn salyp jatty.
Osy sátte biz tańdaýyn jasap bolyp, boıyn tip-tik ustaǵan qalpy syrtqa bettep bara jatqan aqsaqaldy sózge tarttyq. Aty-jónin Qulpybaı Úmbetov dep tanystyrǵan qarıa 82 jasta eken.
– Osy jasyma deıin eshbir saılaýdan qalyp kórgen emespin. Sebebi, ár daýystyń mańyzdy ekenin bir kisideı bilemin. Myna biz, úlkender, «Men barǵanda ne ózgerer deısiń?» deıtin bolsaq, jastardan ne talap ete alamyz? Jasymyz da birazǵa keldi. Biraq búgingideı el taǵdyry synǵa túsip jatqan shaqta «aýyryńqyrap tur edim, aıaǵym bastyrmaı turǵany» degen syltaýdy aıta almaımyn. Kezinde laýazymdy qyzmetter atqardyq. El úshin, halyqtyń jaıly ómiri úshin ter tóktik. Endigi úmitti jastarǵa artamyz. Men nemere, shóberelerimizdiń jarqyn ómiri úshin jáne Jańa da Ádiletti Qazaqstannyń berik ornap, tuǵyrly bolýyna daýys berdim, – deıdi Qulpybaı Erleruly.