Atom energetıkasy jónindegi agenttik tóraǵasy Almasadam Sátqalıevtiń málimdeýinshe, AES ataýyna qatysty 28 myńnan astam usynys túsken, dep habarlaıdy aqshamnews.kz
Baıqaý aıaqtalý satysynda tur. Qazaqstan azamattarynan 28 myńnan astam usynys aldyq. Úlken qyzyǵýshylyq baıqaldy. Qazir «Ulttyq aqparattyq tehnologıalar» AQ-pen birge ótinimderdiń qurylymyn túsiný úshin jan-jaqty taldaý jumystary júrgizilip jatyr. Eń aldymen ornalasý óńirin, jasyn, genderlik máselelermen baılanysty sanatyn túsinip alǵymyz keledi. Sodan keıin baıqaý komısıasynyń qorytyndy otyrysyn ótkizý arqyly jınaqtaý jumysy júrgizilip, Balqash stansasynyń túpkilikti ataýy aıqyndalady, - dedi agenttik basshysy.
Onyń atap ótýinshe, usynystardyń ishinde tarıhı, geografıalyq ataýlar, tarıhı tulǵalardyń esimderi, tehnologıalyq sheshimdermen baılanysty óte tanymal ataýlar bar. Osy oraıda ol komısıa múshelerine belgili bir deńgeıde yqpal etpeý úshin keıbir tanymal ataýlardy ataýdan bas tartty.
"Buǵan deıin komısıa ataýǵa tolyqtaı saı kelýi tıis birqatar ólshemshartty aıqyndaǵan bolatyn. Kópke birdeıligi negizgi ólshemsharttardyń biri. Munan bólek, atom salasynyń ımıjine sáıkestigine baılanysty máseleler de bar. Ol Qazaqstan halqy úshin mádenı-tarıhı qundylyqtardy da pash etýi tıis. Olardyń áýezdi, qysqa, qazaq, orys jáne aǵylshyn tilderinde azamattarǵa barynsha túsinikti bolýy aıryqsha mańyzdy. Munyń bári sheshim qabyldaý barysynda nazarǵa alynady", - dedi Almasadam Sátqalıev.
AES ataýyna qatysty usynystardy qabyldaý 2025 jylǵy 10 qazan saǵat 23:59–da aıaqtaldy. Bastamanyń basty maqsaty — bolashaq stansıanyń tarıhı, mádenı jáne ulttyq mańyzyn beıneleıtin ataýdy tańdaý.