Búgin Qazaqstannyń tarıhynda tuńǵysh ret aýyl ákimderin saılaý ótip jatyr.
Bul týraly Májilis depýtaty Erlan Saırov óziniń Facebook paraqshasynda jazdy, dep habarlaıdy Almaty-akshamy.kz
«Qurmetti dostar! Búgin Qazaqstannyń saıası tarıhynda máni zor, maǵynasy tereń is-shara bolyp jatyr! Saıası arenada birinshi ret aýdandyq deńgeıdegi aýyl, kent, qala ákimderiniń tikeleı saılaýy ótýde. Respýblıkanyń 14 oblysynyń 176 aýdanynda 730 aýyl ákimi saılanýda, jyldyń aıaǵyna deıin 775 ákim saılanady dep kútilýde. Bul - Qazaqstan Respýblıkasynyń Prezıdenti Qasym-Jomart Toqaevtyń saıası reformalarynyń praktıkalyq kórinisi! Elimizde birte-birte, evolúsıalyq jolmen qoǵamdyq-saıası ózgerister bolyp jatyr!» dep jazdy depýtat.
Respýblıka boıynsha saılaýǵa qatysý úshin 2582 adam kandıdat retinde usynylyp, 2297(88,9%) tirkeýden ótti. Saılaýǵa elimizde tirkelgen barsha partıalar qatysýda. 878 (38,2%) úmitkerdi partıalar usynýda. Kandıdattardyń basym kópshiligi 1419 (61,8%) ózin-ózi usynýshylar. Azamattar bul saılaýdy óziniń azamattyq pozısıasyn bildirýge naqty múmkindik ekendigin túsinýde. Qoǵamdyq-saıası reformalar aımaqtarda ótýi tıis, óıtkeni Qazaqstan aımaqtardan turady.
«Memleket basshysy Q.Toqaev atap ótkendeı, «Aýyl ákimderiniń saılaýy - bizde demokratıa damytýdaǵy mańyzdy qadam». Bul reformalar memleket apparatynyń aýdan, aýyl deńgeıindegi jaýapkershilikti jikteýdi júıeleýi tıis. Atalǵan qadam azamattardyń, qoǵamnyń saıası mádenıetin arttyra otyryp, elimizde saıası plúralızm prınsıpterin arttyrýǵa septigin tıgizeri sózsiz. Nur Otan partıasy bul saılaýdyń taza, adal ótýine múddeli! Batys áleminiń qaryshty damýynyń basty trıggeriniń biri - jergilikti ózin-ózi basqarý prınsıpteri ekendigi belgili. Bul saılaý Qazaqstanda osy ózin-ózi basqarý prınsıpteriniń alǵysharty bolyp tabylady. Sonymen birge, Táýelsizdik jyldary halyq birinshi ret jappaı ózderiniń ákimderin tikeleı saılap alýǵa qoly jetip otyr. Óte úlken progresıvti qadam! Biz tarıhı oqıǵaǵa kýáger bolýdamyz. Alǵa, Qazaqstan!» - degen jazba jarıalady Erlan Saırov.