Qazaqstannyń Qarýly Kúshteri Kabýldaǵy tolyq haos jaǵdaıynda qysqa ýaqytta kúrdeli operasıa júrgize aldy.
Saıasattanýshy, QR Prezıdentiniń keńesshisi Erlan Qarın Aýǵanstannan QR azamattaryn evakýasıalaý operasıasynyń qalaı júrgizilgenin baıandady, dep habarlaıdy Almaty-akshamy.kz.
«Qazaqstannyń Qarýly Kúshteri Kabýldaǵy tolyq haos jaǵdaıynda qysqa ýaqytta kúrdeli operasıa júrgize aldy. Aldymen ózderinde alańdaýshylyq pen problema tolyp jatqan amerıkalyqtarmen kelissóz júrgizý kerek boldy, sodan keıin azamattarymyzdy Kabýlǵa jınap, áýejaıǵa qaýipsiz túrde aparyp, sodan keıin blokbeketter arqyly áýejaı aýmaǵyna kirý úshin sondaǵylardyń bárimen kelissózder júrgizildi», - dep jazdy E. Qarın óziniń Telegram-paraqshasynda.
Saıasattanýshynyń aıtýynsha, 15 tamyz kúni jeksenbide Prezıdent QR azamattary ben dıplomattarynyń qaýipsizdigin qamtamasyz etý boıynsha tapsyrma berdi, al 18 tamyzda olar Qazaqstanǵa jetkizildi.
«Operasıa 3 kún ishinde josparlandy, uıymdastyryldy jáne ótkizildi. Bizdiń áskerıler men dıplomattarymyz pandemıa kezinde, 2020 jyldyń kókteminde azamattarymyzdy túrli elderden shuǵyl áketýge májbúr bolǵanda jáne «Jýsan» operasıasy kezinde osyndaı gýmanıtarlyq operasıalardy júrgizip, jaqsy tájirıbe jınaqtady. Sondaı-aq bizdiń áskerıler óz azamattarymyzben birge qyrǵyz dıplomattaryn da evakýasıalady», - dedi Erlan Qarın.
Aıta keteıik, 18 tamyz kúni Qazaqstan Aýǵanstannan 42 adamdy evakýasıalady jáne Almaty qalasyna jetkizdi. Ushaqta 25 Qazaqstan azamaty, onyń ishinde 15 eresek adam jáne 10 bala, sondaı-aq QR Elshiliginiń qyzmetkerleri bolǵan. Odan basqa, osy bortpen Qyrǵyzstan tarapynyń ótinishimen 14 azamat evakýasıalandy jáne QR Elshiligine kómek surap júgingen 1 Reseı azamaty men 1 Lıtva azamaty AIR-dan shyǵaryldy.